"Biz yeraltı qaz anbarlarının genişləndirilmə layihəsi üzrə texniki-iqtisadi əsaslandırmanın ikinci variantını hazırladıq və onu Nazirlər Kabinetinə təqdim etdik. Razılıq aldıqdan sonra maliyyələşdirmə və avadanlığın alınması məsələsini nəzərdən keçirəcəyik". Bu barədə "Azəriqaz" QSC-nin sədrinin müavini Nazim Səmədzadə bildirib.
Onun sözlərinə görə, birinci variantda Qaradağ qaz anbarının genişləndirilməsinə təxminən 120 mln. ABŞ dollarının sərf olunması nəzərdə tutulub. Lakin yeni proqram üzrə bu göstərici 160-170 mln. ABŞ dollarına qədər artıb.
Bu gün Azərbaycanda iki çəndən - Qaradağ və Kalmaz qaz anbarından istifadə edilir. Onların ümumi tutumu 1 mlrd. -1,1 mlrd. kubmetr qaz təşkil edir. Genişləndirilmə üzrə görülən işlər zamanı Qaradağ anbarının tutumunun 2-2,2 mlrd. kubmetrə, Kalmaz anbarının tutumunun isə 1-1,2 mlrd. kubmetrə qədər çatdırılması güman edilir. Hazırda maliyyələşdirmə məsələsi üzrə danışıqlar aparılır. Danışıqların 2 il davam edəcəyi güman edilir. Dünya bankı bu layihənin maliyyələşdirilməsinə maraq göstərir.
Qaz anbarlarının gücünün artırılması Azərbaycanda qaz hasilatının artan həcmlərinin qəbulu və saxlanması üçün nəzərdə tutulub.
