Azərbaycan Beynəlxalq Əməliyyat Şirkəti (ABƏŞ) Bakı-Supsa qərb boru kəməri marşrutunda təmirə başlayıb. Bu barədə Trend ə ABƏŞ-in operatoru - BP Azerbaijan şirkətindən məlumat verilib.
Şirkətdən bildirilib ki, hazırda boru kəməri ilə neft nəqlinin nə vaxt bərpa olunacağı məlum deyil, lakin təmir işləri qrafiki qabaqlayır.
İşlər borunun 150 kilometrlik hissəsində Gürcüstan ərazisində aparılır. Əvvəl ekspertlər qrupu tərəfindən boru kəmərinin tədqiqatı zamanı əldə olunmuş məlumatların təhlili zamanı işlər müəyyənləşdirilmişdi. Bu, boru kəməri haqqında məlumatların əldə olunması üçün elektron kürəkciklərin istifadəsindən sonra baş verib.
"Çıraq" yatağında hasil olunan və Bakı-Supsa boru kəməri ilə nəql olunan neft həcmi Bakı-Novorossiysk şimal boru kəməri marşrutuna və dəmir yoluna istiqamətləndirilib. Əgər "Azəri"-"Çıraq"-"Günəşli" yatağının işlənməsi üzrə tərəfdaşlar Supsadan Azeri Light markalı neft alırdılarsa, Novorossiyskdən onlar Urals markalı neft alacaqlar.
Yanvar-oktyabr aylarında Bakı-Supsa boru kəməri ilə ("qərb" marşrutu) 5,616 mln. ton neft ixrac olunub, 2005-ci ilin yanvar-oktyabr aylarında isə bu göstərici 5,756 mln. ton olub. Bakı-Supsa ilə oktyabr ayında 392,134 min ton, 2005-ci ilin oktyabr ayında isə 599,5 min ton ixrac olunub.