Azərbaycan, Bakı, 19 fevral / Trend , müxbirlər S.Babayeva, E.İsmaylov/ "Hewlett Packard (HP) şirkəti əhalinin az təminatlı təbəqəsinin kompyuterlərlə təchiz edilməsini nəzərdə tutan "Xalq kompyuteri" Azərbaycan layihəsinin pilot variantında iştirak etməkdə maraqlıdır",- deyə Azərbaycan Rabitə və İnformasiya Texnologiyaları Nazirliyinin informasiya cəmiyyətinin inkişafı şöbəsinin rəhbəri Rüfət Gülməmmədov bildirib.
"Qlobal maliyyə böhranı üzündən bir sıra maliyyə problemləri üzə çıxdı, çünki güzəştli kreditlərin ayrılması da nəzərdə tutulmuşdu. HP şirkəti isə layihənin pilot versiyasında iştirakı barədə təklif irəli sürüb", - deyə Gülməmmədov bildirib.
Layihə kiçik faizlərlə uzunmüddətli kreditlə kompyuter təqdim etməyi nəzərdə tutur. Layihənin həyata keçirilməsi üçün nazirlikdə İntel və Microsoft korporasiyalarının iştirakı ilə xüsusi işçi qrupu yaradılıb.
Gülməmmədovun sözlərinə görə, mart ayında həyata keçirilməsi planlaşdırılan pilot layihə çərçivəsində HP kompyuterləri və Microsoft proqram təminatçıları yalnız müəllimlər üçün nəzərdə tutulub.
"Gələcəkdə layihə uğurlu alınarsa bu istiqamətdə işlərimizi davam etdirmək üçün əlavə kreditlər əldə etmək məqsədi ilə prosesə investorların cəlb olunması təklifini hökumətə ünvanlayacağıq",- deyə nazirliyin əməkdaşı vurğulayıb.
İdarənin apardığı hesablamalara görə, Azərbaycanda hər 100 nəfərə üç və ya dörd kompüter düşür.
Yeni layihə uğurlu alınarsa, bu rəqəmi beş dəfədən də çox artırmaq olar.
Məqalə müəllifi ilə əlaqə ünvanı: [email protected]