Azərbaycan, Bakı, 28 sentyabr /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyinin Telekommunikasiya şöbəsinin müşaviri Qulam Abdullayev Regional Rabitə Birliyinin (RRB) Radiotezlik spektrlərindən və peyk orbitindən istifadənin nizamlanması komissiyasının sədr müavini seçilib. Trend-in məlumatına görə, bu barədə çərşənbə günü nazirlikdən bildirilib.
Abdullayev bu vəzifəyə 3 illiyə seçilib.
Seçkilər Rusiyanın Saransk şəhərində keçirilən RRB-nin Radioelektron vasitələrin elektromaqnit uyğunluğu və peyk rabitəsi, TV və radioverilişlər üzrə komissiyalarının birgə iclasında keçirilib.
Abdullayevin çərşənbə günü Trend-ə bildirdiyinə görə, bu komissiyalar son illər sıx əməkdaşlıq edirlər, bununla əlaqədar onların birləşdirilməsi və RRB-nin Radiotezlik spektrlərindən və peyk orbitindən istifadənin nizamlanması komissiyasının yaradılması barədə qərar qəbul edilib.
"Komissiyanın əsas fəaliyyəti MDB məkanında tele-radio yayımının inkişafı, radiotezliklərdən bərabər istifadə, peyk orbitlərinin əlaqələndirilməsi məsələlərinin müzakirəsindən ibarətdir. Bununla yanaşı, onun vəzifələrinə Avropa, Afrika və ərəb ölkələrinin analoji strukturları ilə sıx əməkdaşlıq daxildir", - o deyib.
Bir müddət əvvəl Abdullayevin dediyi kimi, Azərbaycan İTU-ya orbital mövqelərin əlaqələndirilməsi məsələləri ilə bağlı müraciət edən bir ölkə kimi bununla əlaqədar prosedur qaydalarının sadələşdirilməsini və qısa vaxt ərzində həll edilməsini istəyir.