Azərbaycan, Bakı, 12 noyabr /Trend, müxbir H.Vəliyev/
Radiotezliklər üzrə Dövlət Komissiyasının Azərbaycanın mobil rabitə operatorlarına (Azercell və Bakcell) 3G standartı üzrə xidmətlərin göstərilməsi üçün tezlik resurslarının ayrılması barədə qərarı mütləq yerinə yetirilməlidir. Bu barədə şənbə günü Trend-ə "Azərbaycanın İnternet Forumu" QHT-nin rəhbəri Osman Gündüz məlumat verib.
Söhbət operatorlara 1900 - 2100 Mhz tezlik resurslarının verilməsindən gedir.
Onun sözlərinə görə, tezlik resursları dövlətin mülkiyyətidir. Azərbaycanın Rabitə və İnformasiya Texnologiyaları Nazirliyi şirkətlərə bu tezliklərin verilməsi üzrə lisenziya verib və onlar (tezliklər) Dövlət Komissiyasının qərarından sonra şirkətlərə verilməlidir.
Noyabrın əvvəllərində Azərbaycanın Rabitə və İnformasiya Texnologiyaları Nazirliyi tərəfindən Azercell və Bakcell şirkətlərinə 3G standartı üzrə xidmətlərin göstərilməsi üçün lisenziyalar verilib.
Bundan əvvbəl nazirlik tərəfindən hazırda kabel yayımı üçün istifadə olunan radiotezliklər spektrindən istifadənin imkanlarına baxılıb.
Avqustun 27-də Azərbaycanın Radiotezliklər üzrə Dövlət Komissiyası 3G üzrə xidmətlərin göstərilməsi üçün Azercell və Bakcell şirkətlərinə tezlik resurslarının verilməsi haqqında qərar qəbul edib.
Hazırda B&BTV Communications kabel televiziyası operatorunun sərəncamında olan tezliklər iki ay ərzində 3G standartlarının yerləşdirilməsi məqsədilə GSM operatorları üçün azad edilməlidir.
Lakin B&BTV Dövlət Komissiyasının 3G şəbəkəsinin yerləşdirilməsi üçün mobil rabitə operatorlarına tezliklərin verilməsinə dair qərarı ilə bağlı müraciət edib.
Azercell rəhbərliyi yaranmış vəziyyəti B&BTV şirkəti tərəfindən yaradılan süni maneə hesab edir. B&BTV Communications kabel televiziyası operatorunun sərəncamında olan tezliklər üzrə Azercell-in apardığı skan etmənin nəticələri bu tezliklərdən istifadə edilmədiyini göstərib.
Buna baxmayaraq, B&BTV bunun əksini bəyan edir və qeyd edir ki, tezlik spektri (2100 Mhz) şirkətin istifadəsindədir və qüvvədə olan lisenziyanın müddəti başa çatana kimi istifadə olunacaq.
B&BTV-yə lisenziya 2007-ci ildə altı il müddətinə verilib.
