Azərbaycan, Bakı /müx. Trend S.Babayeva/ Gələn həftə Bakıya İsrailin rabitə peykləri istehsalçılarından ibarət nümayəndə heyətinin səfəri gözlənilir. Azərbaycanın Rabitə və İnformasiya Texnologiyaları Nazirliyindən verilən xəbərə görə, qonaqlar "AzərSat" layihəsi ilə bağlı nazirliyə öz təkliflərini təqdim etmək niyyətindədirlər.
Nazirlikdən onu da bildiriblər ki, layihədəki iştirakla bağlı artıq beş iri şirkətdən təkliflər gəlib. Bunların arasında "Intelsat", "Eutelsat", "Intersputnik" və digərləri var.
Danışıqların nəticələri Beynəlxalq Elektrorabitə İttifaqına (ITU - International Telecommunication Union) təqdim olunacaq.
Nazirlikdə hesab edirlər ki, real nəticəni üç ildən tez almaq mümkün olmayacaq.
"Rabitə peykinin hazırlanması və orbitə çıxarılması üçün məhz bu qədər vaxt lazımdır" - deyə nazirlikdən bildiriblər.
80-100 milyon dollar dəyəri olan layihənin maliyyə mənbələri hələ müəyyənləşdirilməyib.