Bakı. Trend:
Fransa Xarici İşlər Nazirliyi ekstremistlərin Süveyş kanalı yaxınlığındakı obyekti mühafizə edən Misir əsgərlərinə hücumunu pisləyib.
Trend xəbər verir ki, bu barədə nazirliyin mətbuat xidmətinin bazar günü yaydığı kommünikedə bildirilir.
"Mayın 7-də Sinayda 11 Misir əsgərinin ölümü ilə nəticələnən terror aktını şiddətlə qınayırıq. Həlak olanların ailələrinə başsağlığı verir və yaralananların tezliklə sağalmasını arzulayırıq", - sənəddə deyilir.
Xatırladaq ki, şənbə günü bir qrup ekstremist Süveyş kanalının şərqindəki su stansiyasına hücum edib. Obyekti qoruyan hərbçilər onlarla döyüşə girərək hücumu dəf ediblər, nəticədə 1 zabit və 10 əsgər həlak olub, daha 5 nəfər yaralanıb.