Bakı. Trend:
Nyu-York Federal Ehtiyat Bankı daimi REPO əməliyyatı çərçivəsində uyğun maliyyə qurumlarına rekord həcmdə – 74,6 milyard dollar nağd pul borc verib.
Trend bu barədə xarici KİV-lərə istinadən xəbər verir.
Məlumata görə, bu artım, maliyyə şirkətlərinin ilin sonuna yaxın likvidlik ehtiyaclarını qarşılamaq cəhdləri ilə əlaqələndirilir. Vəsaitin 31,5 milyard dolları ABŞ xəzinə istiqrazları, 43,1 milyard dolları isə ipoteka ilə təmin olunmuş qiymətli kağızlarla təmin edilib. Bu, əvvəlki rekord göstərici olan 31 oktyabr tarixindəki 50,35 milyard dollarlıq borclanmanı da geridə qoyub.
Mütəxəssislər bu tendensiyanı ilin sonu likvidlik tələbatının artması və bazarda stabilliyin qorunması məqsədilə atılmış müvəqqəti addım kimi qiymətləndirirlər.