Bakı.Trend:
Ukraynanın paytaxtı Kiyevdə yerləşən Nüvə Tədqiqatları İnstitutunun ərazisinə PUA zərbəsi endirilib. Hücuma məruz qalan institutun ərazisində VVR-M tədqiqat reaktoru yerləşir.
Bu barədə Ukraynanın Nüvə Tənzimlənməsi üzrə Dövlət Müfəttişliyi məlumat yayıb.
Qurumun məlumatına görə, zərbə sentyabrın 30-da qeydə alınıb. Nəticədə yaranan yanğın operativ şəkildə söndürülüb, xəsarət alan olmayıb. Reaktor və təhlükəsizlik sistemləri zədələnməyib, radiasiya fonunda dəyişiklik qeydə alınmayıb.
Bildirilib ki, reaktor 2022-ci ilin fevralından fəaliyyət göstərmir və onun aktiv zonası tamamilə boşaldılıb.
