Azərbaycan, Bakı /müx. Trend K.Arınova/ Çərşənbə günü Azərbaycan Respublikasının prezidenti İlham Əliyevin rəsmi səfəri çərçivəsində Qazaxıstanda olan Azərbaycan Dövlət Neft Şirkətinin prezidenti Rövnəq Abdullayevin verdiyi məlumata görə, lazım gələrsə Qazaxıstan neftinin nəqli məqsədilə Azərbaycan və Qazaxıstan Bakıdan Qara dənizə qədər yeni kəmər çəkə bilər.
"Əgər Qazaxıstan nefti çox olarsa, bu halda biz Bakıdan Qara dənizə qədər birlikdə kəmər çəkə bilərik" - deyə o bildirib.
Tərəflər həmçinin Gürcüstanın Qara dəniz sahilində yerləşən Kulevi və Batumi limanındakı terminalların birgə istifadəsinin mümkünlüyünü nəzərdən keçirirlər. Terminallardan biri Qazaxıstan şirkətinə, digəri isə Azərbaycan Dövlət Neft Şirkətinə məxsusdur.
Qazaxıstanın "KazMunayQaz" şirkətinin rəhbəri Uzakbay Karabalinin sözlərinə görə, Azərbaycan və Qazaxıstan Turkiyənin Ceyhan limanında terminalın birigə tikintsi layihəsini reallaşdıra bilərlər.
"Bildiyiniz kimi, biz Türkiyədə neft emal zavodu tikmək niyyətindəyik. Bu məsələ uzun müddətdir ki, Qazaxıstan və Türkiyənin, eləcə də Azərbaycan və Türkiyənin yüksək rəhbərləri səviyyəsində müzakirə olunur. Biz bu layihəni gələcəkdə də müzakirə etmək, qiymətləndirmək niyyətindəyik, əgər biz bu layihənin məqsədəuyğun olduğunu görsək, birgə əməkdaşlıq mümkün olacaq" - deyə o bildirib.
Abdullayevin sözlərinə görə, ARDNŞ Ceyhanda neft emalı zavodunun tikintisi proseduruna başlayıb. "Biz tikinti üçün lisenziya almışıq və layihələndirmə işinə başlamışıq. Əgər "KazMunayQaz"ın istəyi olsa, biz bu layihəni birlikdə həyata keçirəcəyik" - deyə o bildirib.
