Bakı. Trend:
Əlverişli əməliyyat mühiti və güclü dövlət dəstəyi Azərbaycanın bank sistemi üzrə proqnozun müsbət qalmasına imkan verir.
Trend xəbər verir ki, bu barədə beynəlxalq reytinq agentliyi “Moody’s”in hesabatında qeyd olunub.
“Azərbaycanın bank sistemi üzrə əlverişli əməliyyat mühitinin davam etməsini və dövlət dəstəyinin güclənməsini əks etdirən “müsbət” proqnozu saxlayırıq.
Əlverişli fəaliyyət şəraiti növbəti 12–18 ay ərzində aktivlərin keyfiyyətini və gəlirliliyi dəstəkləyəcək, tənzimləyici tələblərin sərtləşdirilməsi isə kapitalın möhkəmlənməsinə və likvidliyin idarə olunmasının yaxşılaşmasına kömək edəcək.
Aktivlərin keyfiyyəti xüsusilə Azərbaycanda gəlirlərin artmasından və bankların əsas fəaliyyət göstərdiyi qeyri-neft iqtisadiyyatının genişlənməsindən faydalanacaq ki, bu da kreditləşmənin artımına töhfə verəcək. Bankların etibarlı kapital buferləri və davam edən yüksək gəlirlilik itkilərin udulması qabiliyyətinin və kifayət qədər likvidliyin qorunmasına imkan verəcək. Hökumətin, xüsusilə ən iri banklara dəstək göstərmək qabiliyyəti və hazırlığı yüksək səviyyədə qalacaq”,- deyə hesabatda bildirilib.
“Moody’s” analitikləri qeyd edirlər ki, dövlətin kredit qabiliyyətinin yaxşılaşması və reytinq üzrə proqnozun “müsbət” olması iri bankların əmanətçilərinin dövlət dəstəyini almağa davam edəcəyi anlamına gəlir.
Hesabatda vurğulanır ki, 2025-ci ilin dekabr ayına olan vəziyyətə görə suveren fond, Azərbaycan Respublikasının Dövlət Neft Fondu və Mərkəzi Bank tərəfindən toplanmış ümumi ehtiyatlar ÜDM-in 108 faizini üstələdiyindən, hökumət iqtisadiyyata və yüksək dollarlaşmış bank sisteminə dəstək göstərmək üçün əlverişli mövqedədir.
