Bakı.Trend:
Çexiyanın biznes dairələri Orta Dəhliz çərçivəsində əməkdaşlığın inkişafı üçün yeni imkanları nəzərdən keçirir.
Bu barədə Çexiyanın nəqliyyat naziri İvan Bednarjik Cənubi Qafqaz və Mərkəzi Asiya ölkələrinə səfəri ərəfəsində bazar ertəsi Trend-ə verdiyi özəl müsahibədə bildirib.
Onun sözlərinə görə, Cənubi Qafqaz və Mərkəzi Asiya Avropa ilə Asiya arasında nəqliyyat əlaqələrinin təmin olunmasında getdikcə daha böyük əhəmiyyət kəsb edir. Çexiya isə dəmir yolu nəqliyyatı, logistika, şəhər mobilliyi və mülki aviasiya sahələrində öz təcrübə və texnologiyalarını təklif edə bilər.
“Biznes nümayəndə heyətinin müşayiəti ilə həyata keçirdiyim səfərin konkret məqsədi nəqliyyat və logistika sahəsində əməkdaşlığı gücləndirmək, eləcə də Çexiya şirkətləri ilə onların Azərbaycanda, Qırğızıstanda və Qazaxıstanda potensial tərəfdaşları üçün yeni biznes imkanları yaratmaqdır. Hər üç ölkədə proqramımıza nazirlik səviyyəsində bir sıra görüşlər, biznes forumları, həmçinin dövlət qurumlarının və şirkətlərin nümayəndələri ilə görüşlər daxildir. Azərbaycan sabit siyasi və iqtisadi mühitə malik, sürətlə inkişaf edən ölkədir. Belə bir ölkəyə investisiya yatırmaq imkanı hər bir investor üçün yaxşı xəbərdir”, – deyə nazir qeyd edib.
Bednarjik vurğulayıb ki, Azərbaycana səfəri zamanı bu ilin may ayında Azərbaycanın rəqəmsal inkişaf və nəqliyyat naziri Rəşad Nəbiyevlə imzaladığı memorandumda əksini tapan razılaşmaların inkişaf etdirilməsini və gələcək əməkdaşlığın konkret istiqamətlərinin müəyyənləşdirilməsini planlaşdırır.
“Prioritetlərimiz Transxəzər nəqliyyat dəhlizinin inkişafı, dəmir yolu infrastrukturunun və şəhər nəqliyyatının, xüsusilə metronun modernləşdirilməsi, hava nəqliyyatı əlaqələrinin genişləndirilməsi və müasir nəqliyyat texnologiyalarının tətbiqidir”,- deyə nazir bildirib.
Orta Dəhlizin inkişafına Çexiyanın baxışı
Nazir qeyd edib ki, Orta Dəhliz Avropa ilə Asiya arasında təchizat zəncirlərinin dayanıqlığını artırır.
“Azərbaycan Çexiyanın regiondakı mühüm tərəfdaşıdır. Nəqliyyat əməkdaşlığımızın əsas istiqamətlərindən biridir. Bu, xüsusilə Avropa ilə Asiya arasında əsas yük marşrutlarından biri olan Transxəzər Beynəlxalq Nəqliyyat Marşrutunun artan əhəmiyyəti fonunda xüsusi aktuallıq kəsb edir. Çexiya baxımından bu dəhliz regionla əlaqələrimizi genişləndirdiyinə və Avropa ilə Asiya arasında təchizat zəncirlərinin dayanıqlığını artırdığına görə əhəmiyyətlidir. Buna görə də bu istiqamətdə logistika əlaqələrini gücləndirməyə və Çexiya şirkətləri üçün yeni imkanlar yaratmağa çalışırıq. Dəmir yolu nəqliyyatı və şəhər mobilliyi ilə yanaşı, aviasiya və müasir nəqliyyat texnologiyaları sahələrində də əməkdaşlıqda maraqlıyıq”, – deyə Bednarjik əlavə edib.
Nazir vurğulayıb ki, Orta Dəhliz çərçivəsində logistika, gömrük prosedurları və koordinasiya ilə bağlı bütün problemlər bir-biri ilə əlaqəlidir və kompleks yanaşma tələb edir.
“Bununla belə, mən ilk növbədə mövcud dar boğazların aradan qaldırılmasını, prosedurların sürətləndirilməsini, konteyner və multimodal terminalların kifayət qədər ötürücülük qabiliyyətinin təmin olunmasını vacib hesab edirəm. Həmçinin yalnız bir nəqliyyat növünə güvənmədən mövcud nəqliyyat infrastrukturunu təkmilləşdirməli və yüklərin daşınması üçün alternativ marşrutlar təmin etməliyik. Sərhədlərarası prosedurları sadələşdirən mexanizmlər və multimodal terminalların kifayət qədər ötürücülük qabiliyyəti də az əhəmiyyət daşımır. Buna görə də logistika və yükdaşımalar Azərbaycanın müvafiq qurumları, Avropa İttifaqının Bakıdakı nümayəndəliyi və nəqliyyat sektorunun təmsilçiləri ilə danışıqlarımın əsas mövzularından olacaq”, – deyə o izah edib.
Bednarjikin sözlərinə görə, Transxəzər nəqliyyat dəhlizinin əhəmiyyəti sürətlə artsa da, onun gələcək inkişafı infrastruktura investisiyaların yatırılmasını, logistika və gömrük proseslərinin modernləşdirilməsini, eləcə də bütün marşrut boyunca yerləşən ölkələr arasında daha sıx qarşılıqlı fəaliyyəti tələb edir.
“Bu, Avropa İttifaqı ölkələrinə də aiddir. Məhz buna görə də bu ilin yazında dəmir yolu ilə yükdaşımaların rəqabət qabiliyyətinin artırılması və beynəlxalq nəqliyyat dəhlizləri arasında koordinasiyanın yaxşılaşdırılması məsələləri üzrə ümumavropa müzakirəsinə təşəbbüs göstərdim. Həmçinin Çexiyanın İqtisadi Əməkdaşlıq və İnkişaf Təşkilatı (OECD) yanında Beynəlxalq Nəqliyyat Forumuna (ITF) sədrliyi dövründə mövcud dar boğazların aradan qaldırılması üzərində işləyirəm. Avropa nəqliyyat dəhlizləri boyunca uyğunlaşdırılmış nəqliyyat sistemlərinə malik vahid rəqəmsal və logistika məkanının yaradılması, şübhəsiz ki, uzun vaxt tələb edəcək. Bu sahədə Çexiya və Azərbaycanın daha sıx əməkdaşlıq etməsi və fəaliyyətlərini əlaqələndirməsi vacibdir. Səfərim çərçivəsində, o cümlədən Çexiya şirkətləri və tədqiqatçıları arasında qarşılıqlı əlaqələrin təşviqi vasitəsilə diqqətimi məhz bu məsələyə yönəltmək niyyətindəyəm”, – deyə nazir bildirib.
Orta Dəhlizdən kənarda nəqliyyat sahəsində əməkdaşlıq
Bednarjik şəhər və regional dəmir yolu nəqliyyatı sahələrində də əhəmiyyətli əməkdaşlıq potensialının olduğunu qeyd edib.
“Çexiya şirkətləri dəmir yollarının elektrikləşdirilməsi, hərəkət tərkibinin istehsalı, hərəkətin idarə edilməsi, eləcə də aviasiya və dəmir yolu nəqliyyatı üçün müasir texnoloji həllərin hazırlanması sahələrində təcrübəyə malikdirlər. Onlar həmçinin şəhər mobilliyi və hava nəqliyyatı əlaqələri sahələrində kompleks həllər təklif edirlər. Biz hidrogenlə işləyən nəqliyyat da daxil olmaqla, sıfır emissiyalı texnologiyaların tətbiqi və müasir qatarlar, metro qatarları və elektrik avtobusları vasitəsilə ekoloji cəhətdən dayanıqlı şəhər mobilliyinin inkişafı üçün əməkdaşlıq perspektivləri görürük. Avropada bu istiqamət sürətlə inkişaf edir.
Məsələn, Çexiyanın "Škoda Group" şirkəti akkumulyatorla işləyən qatarların Avropanın aparıcı istehsalçılarından biridir və məhsullarını bir çox Avropa ölkəsinə tədarük edir. Şəhər və şəhərətrafı avtobus nəqliyyatı üçün texnologiyalar təklif edən digər uğurlu Çexiya şirkətləri də var. Bizim üçün əsas məsələlərdən biri Bakı metropoliteninin modernləşdirilməsidir. "Škoda Group" bu sahədə öz təcrübə və səriştələrini təklif edə bilər. Regional elektrik qatarları və zəruri texniki infrastrukturun yaradılması sahələrində də əməkdaşlıq imkanları görürük”, – deyə nazir bildirib.
Nazir mülki aviasiyanı əməkdaşlığın perspektivli istiqamətlərindən biri kimi qeyd edib.
“Bakı ilə Praqa arasında birbaşa hava əlaqəsinin yaradılması imkanlarını, eləcə də hava limanı infrastrukturu, mütəxəssislərin hazırlanması və hava hərəkətinin təhlükəsiz idarə olunması texnologiyaları sahələrində əməkdaşlığı müzakirə etmək istəyirik. Məsələn, ERA şirkəti Azərbaycanda artıq mövcud olan iş təcrübəsinə əsaslanaraq fəaliyyətini genişləndirə bilər”, – deyə Bednarjik qeyd edib.
Onun sözlərinə görə, Çexiya tərəfi Azərbaycanla dəmir yolu yükdaşımaları və logistika sahələrində əməkdaşlığın dərinləşdirilməsi üçün də böyük potensial görür.
“Mənimlə birlikdə Bakıya Çexiyanın dəmir yolu ilə yükdaşımalar üzrə ən böyük operatoru olan "ČD Cargo" şirkətinin baş direktoru da gələcək. Şirkət təkcə Çexiyada deyil, Slovakiya, Macarıstan, Polşa, Avstriya və Almaniyada da fəaliyyət göstərir.
Azərbaycanlı tərəfdaşlarımızla yüklərin göndəricidən alıcıya çatdırılması üçün rəqabətə davamlı tariflər təklif edəcək, multimodal daşımaları əlaqələndirəcək və tranzit prosedurlarının sadələşdirilməsini təmin edəcək birgə logistika operatorunun yaradılması imkanlarını da müzakirə etməkdə maraqlıyıq”, – deyə nazir əlavə edib.
Bednarjik həmçinin vurğulayıb ki, "ČD Cargo" və "EGT Express" də daxil olmaqla, Çexiyanın dəmir yolu operatorları, eləcə də müvafiq sahə və logistika assosiasiyaları beynəlxalq yükdaşımalar sahəsində əhəmiyyətli təcrübəyə malikdirlər və inteqrasiya olunmuş logistika xidmətlərinin inkişafına töhfə verə bilərlər.
""OMNIPOL Group" və "Škoda Group" şirkətlərinin təmsil edəcəyi hava nəqliyyatı əlaqələri və şəhər mobilliyi sahələrində də yeni tərəfdaşlıqlar üçün perspektivlər görürük. Oktyabrın 12-də Bakıda keçirilməsi planlaşdırılan Çexiya-Azərbaycan biznes forumu konkret işgüzar əlaqələrin qurulması üçün yaxşı imkan olacaq", – deyə o, fikrini yekunlaşdırıb.
