Azərbaycan, Bakı, 19 mart / Trend , Ü.İsmayılova/
Bakı şəhəri Əzizbəyov rayonunun Zirə qəsəbəsi ərazisində RTK-GPS sistemindən istifadə olunmaqla kadastr çəkilişinin aparılması üçün GPS avadanlığı və Azərbaycanda torpaq kadastr sisteminin təkmilləşdirilməsi üzrə GPS stansiyası quraşdırılıb. Bu barədə cümə günü Dövlət Torpaq və Xəritəçəkmə Komitəsindən bildirilib.
GPS avadanlığı və GPS stansiyalarının quraşdırılması üzrə işlər Koreyanın Beynəlxalq Əməkdaşlıq üzrə Agentliyi (KOICA) və Koreya Kadastr Çəkilişləri Korporasiyası (KCSC) ilə birgə layihə çərçivəsində Dövlət Torpaq və Xəritəçəkmə Komitəsi tərəfindən həyata keçirilib.
Azərbaycan Dövlət Torpaq və Xəritəçəkmə Komitəsi 2009-cu il 23 iyun tarixində Koreyanın xarici işlər və ticarət naziri ilə "Azərbaycanda torpaq kadastr sisteminin təkmilləşdirilməsi" layihəsi üzrə 1,5 milyon dollar məbləğində zəmanət müqaviləsi imzalayıb.
Torpaq kadastrına beş əsas element daxildir: dövlət reyestri, həcmin və keyfiyyətin qeydiyyatı, torpağın ekoloji göstəricilərinin kadastrı, torpağın iqtisadi baxımdan qiymətləndirilməsi və kadastr xəritəsinin hazırlanması.
Layihənin əsas fəaliyyət sahələri kadastr xəritələrinin hazırlanması və kadastr-informasiya sisteminin yaradılması məqsədilə Zirə qəsəbəsində torpaqların qeydiyyatı üçün aerofotoçəkilişlərin və müasir avadanlıqlarla əraziölçmə işlərinin aparılmasıdır.