Bu gün Bakı biznes mərkəzində səlahiyyətli kredit təşkilatlarının nümayəndələri ilə görüş keçirilib. Trend İqtisadi İnkişaf Nazirliyinə istinadən xəbər verir ki, görüşdə nazir Heydər Babayev regional transmilli layihələrin əsas iştirakçısı olan Azərbaycanda iqtisadi artımın sürətləndiyini qeyd edib. Buna sübüt yarım ildə ÜDM həcminin 36,3%, əhalinin gəlirlərinin isə təxminən 20% artımıdır.
İqtisadiyyatın inkişafında bank sektorunun rolu da var. Yarım ildə kredit təşkilatları tərəfindən ölkə iqtisadiyyatına 1,6 mlrd. manat qoyulub, bu da ötən ilki göstəricidən 40% çoxdur. Ümumi kredit porftelində uzunmüddətli kreditlərin çəkisi 45%-i üstələyib ki, bu da bankların uzunmüddətli investisiya layihələrinə olan maraq və ölkə biznes mühitinə etibarın artmasından xəbər verir.
Nazirliklə kredit təşkilatları arasında əməkdaşlığının ən mühüm istiqamətlərindən biri müəssisələrin Sahibkarlığa Kömək Milli Fondu (SKMF) vasitəsilə maliyyələşdirilməsidir. Birinci yarım ildə SKMF-nın vəsaiti hesabına ölkənin 57 şəhər və rayonu üzrə 948 sahibkarlıq subyektinə 43,3 mln manatlıq güzəştli kredit verilib. Bu isə təxminən 9 min iş yerinin açılmasıdır.
Nazirin sözlərinə görə, bu prosesin səmərəliyini artırmaq məqsədilə fondun vəsaitindən istifadə qaydaları təkmilləşdiriləcək. Burada vəsaitin həcminin və müddətinin artırılması, prosesin daha da şəffaflaşdırılması nəzərdə tutulub.
Qeyd olunan uğurlarla yanaşı, güzəştli kreditlərin verilməsi sahəsində bir sıra problemlər və çatışmazlıqlar da qalmaqdadır. Görüşün əsas məqsədi həmin problemləri ətraflı müzakirə etmək və əməkdaşlıq perspektivlərini müəyyənləşdirməkdir. Problemlərin həlli üçün kredit təşkilatları öz təkliflərini irəli sürüb. Əsas problem sahibkarların maarifləndirmə səviyyəsinin aşağı olması, bəzi hallarda alınmış kreditlərin biznes planda nəzərdə tutulmayan sahələrə yönəldilməsidir.
SKMF direktorunun vəzifələrini icra edən Elçin Zeynalov sahibkarlara güzəştli kreditlərin verilməsi istiqamətində aparılan iş barədə məlumat verib. Görüşdə kreditlərin verilməsi zamanı əmlakın girov kimi qəbul edilməsi, girov qoyulmuş əmlakı qiymətləndirərkən müstəqil qiymətləndiricilərin xidmətlərindən geniş istifadə olunması, müvəkkil kredit təşkilatlarının filial şəbəkələrinin genişləndirilməsi və s. məsələlər müzakirə olunub.
