Bakı.Trend:
Kapital tələblərinin artırılması Azərbaycanın bank sektorunun dayanıqlığının möhkəmlənməsinə töhfə verib.
Bu barədə Trend-in əldə etdiyi "Moody's" agentliyinin yeni hesabatında deyilir.
Agentliyin məlumatına görə, Azərbaycanda Basel III standartları çərçivəsində yeni kapital buferləri artıq tətbiq olunub və 2027-ci ildə Basel III tələblərinə tam uyğunluğun təmin ediləcəyi gözlənilir.
"Moody's" analitikləri bildirirlər ki, normativ-hüquqi bazanın Basel III standartlarına uyğunlaşdırılması, risk-əsaslı nəzarət mexanizmlərinin tətbiqi və kapital tələblərinin artırılması sayəsində bank sektorunun tənzimlənməsi daha da gücləndirilir.
"Hazırda Mərkəzi Asiya və Qafqaz ölkələrinin bank tənzimləyiciləri, o cümlədən Qazaxıstan (Baa1, proqnoz "sabit"), Azərbaycan (Baa3, proqnoz "müsbət"), Gürcüstan (Ba2, proqnoz "sabit"), Ermənistan (Ba3, proqnoz "müsbət"), Özbəkistan (Ba2, proqnoz "sabit"), Tacikistan (B2, proqnoz "sabit") və Qırğızıstan (B3, proqnoz "müsbət") beynəlxalq standartlara yaxınlaşaraq nəzarət mexanizmlərini gücləndirir və prudensial tənzimləməni təkmilləşdirirlər. Bu dəyişikliklər kredit baxımından müsbət qiymətləndirilir, çünki onlar kredit portfellərinin keyfiyyətinin yaxşılaşmasına, bankların zərərləri qarşılamaq qabiliyyətinin artmasına və sistem risklərinin tədricən azalmasına şərait yaradır", – hesabatda qeyd olunub.
"Moody's" bildirir ki, tənzimləyici islahatlar region ölkələrinin əksəriyyətində prudensial tələblərin sərtləşdirilməsinə və risklərin idarə edilməsi sisteminin təkmilləşdirilməsinə səbəb olub.
"Söhbət kapital buferlərinin artırılması, aktivlərin daha konservativ təsnifatı, kreditlər üzrə mümkün itkilər üçün ehtiyatların gücləndirilməsi və likvidliyin idarə olunmasının təkmilləşdirilməsi kimi tədbirlərdən gedir. Bir sıra ölkələr həmçinin bankların bərpası və tənzimlənməsi mexanizmlərinin daha səmərəli qurulması istiqamətində irəliləyiş əldə ediblər. Nəzarətin gücləndirilməsi zərərlərin vaxtında tanınmaması hallarını azaltmağa imkan verib və tənzimləyici qurumlar daha proaktiv fəaliyyət göstərməyə başlayıblar. Kapital tələblərinin artırılması Qazaxıstan və Azərbaycanın banklarının ödəmə qabiliyyətini möhkəmləndirib. Özbəkistanda isə direktiv kreditləşdirmədən qismən imtina kredit portfelinin keyfiyyətinin yaxşılaşmasına və kreditlərin bölüşdürülməsində risk-əsaslı yanaşmanın daha geniş tətbiqinə şərait yaradıb. Bununla belə, dövlətin bank sisteminə təsiri hələ də əhəmiyyətli dərəcədədir", – sənəddə vurğulanır.
"Moody's"in proqnozuna əsasən, region ölkələrinin hökumətləri maliyyə sabitliyinə, şəffaflığa və bank sektoru ilə bağlı şərti öhdəliklərin məhdudlaşdırılmasına xüsusi diqqət yetirməklə prudensial standartların gücləndirilməsi və nəzarət təcrübəsinin təkmilləşdirilməsi istiqamətində fəaliyyətlərini davam etdirəcəklər.
Bununla yanaşı, agentlik vurğulayır ki, islahatların tempi və effektivliyi dövlət institutlarının keyfiyyətindən, bank nəzarəti orqanlarının müstəqilliyindən və bazar prinsiplərinə əsaslanan bank sisteminin inkişafına siyasi sadiqlik səviyyəsindən asılı olaraq ölkələr arasında əhəmiyyətli dərəcədə fərqlənəcək.
