Azərbaycan,Bakı/müxbir Trend E.Hüseynov/Azərbaycan prezidenti İlham Əliyev 15-16 martda Tacikistana rəsmi səfər etmək niyyətindədir. Bu barədə eksklüziv olaraq Trend ə Tacikistan XİN-in dövlət protokolu idarəsinin rəisi Xomicon Nazarov məlumat verib.
Onun sözlərinə görə, səfərə hazırlıq məqsədilə Azərbaycan xarici işlər nazirinin müavini Xələf Xələfovun başçılığı altında nümayəndə heyəti Düşənbədədir. Matın 9-da Azərbaycan nümayəndə heyətini Tacikistan xarici işlər nazirinin birinci müavini Saymumin Yatimov qəbul edib. Görüşdə Azərbaycan prezidentinin qarşıdan gələn səfəri ilə bağlı məsələlər müzakirə edilib.
Bundan başqa, idarələrarası xarakterli məsləhətləşmələr aparılır - Azərbaycan nümayəndə heyətinin üzvləri Tacikistanlı həmkarları ilə səfər çərçivəsində imzalanacaq sənədlərin razılaşdırılması məqsədilə danışıqlar aparır. Tərəflər martın 12-nə qədər səfər proqramı ilə bağlı bütün detalların tamamlanması məqsədilə lazımi məsləhətləşmələr aparmağı qərara alıb, - deyə X.Nazarov əlavə edib.