Azərbaycan, Bakı, 3 dekabr /Trend, müxbir A.Axundov/
Vergilər Nazirliyi 2013-cü ildə elektron imzanın verilməsinə başlayacaq. Bu barədə bazar ertəsi Trend-ə vergilər nazirinin müavini Sahib Ələkbərov deyib.
"Hazırda ölkədə hüquqi şəxslərin qeydiyyata alınmasının genişləndirilməsində əsas maneə elektron imzanın tətbiqi prosesinin yavaş getməsidir. Ümumilikdə vəziyyət normal qiymətləndirilir, hüquqi şəxslərin qeydiyyatı tempi proqnozlarla üst-üstə düşür", - nazir müavini qeyd edib.
Bu günədək təqribən 700 hüquqi şəxs onlayn qeydiyyatdan keçib.
"Bununla əlaqədar elektron imzanın verilməsi qaydaları və proseduru üzərində işləyirik, - Ələkbərov deyib. - Belə bir layihə var və Vergilər Nazirliyinin özü müvafiq strukturlara elektron imzaların verilməsində kömək edəcək. Bundan sonra vəziyyət əsaslı şəkildə dəyişəcək. Biz özümüz elektron imza verəcəyik. Bu prosesə təzəlikcə başlayırıq və yaxın ildə bu məsələ həll oluna bilər".
Onun sözlərinə görə, hüquqi şəxs olan qeyri-rezidentlərin qeydiyyatı da məqsədəuyğundur.
"Hələlik bu bizim üçün mürəkkəb məsələdir. Bunun üçün elektronlaşdırmanın müvafiq səviyyəsi olmalıdır. Belə bir layihə var və biz bunun üzərində işləyirik. Bu, 1-2 ilin məsələsidir", - Ələkbərov vurğulayıb.