Azərbaycan, Bakı /müx. Trend İ.Xəlilova/ 2007-ci ilin sonuna kimi Azərbacanın fond bazarının ümumi dövriyyəsi 3 mlrd. dollara çatacaq. Bu barədə məlumatı cümə axşamı Bakı Fond Birjasının İdarə Heyətinin sədri Xəyal Abdinov Bakıda keçirilən MDB və Baltikyanı dövlətlərin istiqraz konqresi çərçivəsində verib.
Onun sözlərinə görə, bu cür proqnozlar 2007-ci ilin beş ayının nəticələri ilə bağlıdır. Bu nəticələrə görə qiymətli kağızlar bazarında dövriyyə 1,4 mlrd. dollara çatıb.
Abdinov hesab edir ki, birjanın 6 illik fəaliyyəti dövründə fond bazarında müxtəlif tendensiyalar müşahidə olunub. Birinci ildə dövriyyə 35 mln. manat, ikinci ildə - 91 mln. manat, üçüncü ildə - 100 mln. manat təşkil edib. Müvafiq olaraq 2003 - ci ildə bu göstərici 98 mln. manat, 2004 -cü ildə isə 94 mln. manat olub.
"Fond bazarının sürətli artımı 2005-ci ildə başlayıb. O zaman müvafiq göstərici 517 mln. manata çatmışdı. 2006-ci ildə bu göstərici rekordları vuraraq 1,388 mlrd. manat oldu" - deyə o bildirib.
Birja bazarı strukturunda böyük pay dövlət qiymətli kağızlarının üzərinə düşür. Qısamüddətli dövlət istiqrazlarının payı 8,5 faiz, notlar - 70 faiz, səhmlər - 10 faiz, istiqrazlar - 3 faiz, repo- 8,75 faiz təşkil edib.