2007-ci ilin iyun ayında BP Azerbaijan STEP proqramı çərçivəsində Səngəçaldakı terminalın genişləndirilməsi üzrə işləri tamamlamağı planlaşdırır. Bu barədə Trend xəbər verir. Terminal menecmentinin nümayəndəsi Piter Barralet bu gün jurnalistlərə məlumat verib ki, terminalın genişləndirilməsi BP-nin bilavasitə terminalla bağlı bütün layihələri üçün iyun ayında başa çatacaq.
Onun sözlərinə görə, 2006-cı ilin oktyabr ayında Səngəçaldakı terminalda onun "Şahdəniz" layihəsi çərçivəsində genişləndirilməsi üzrə işlər başa çatıb. Bu layihədə sonradan Cənubi Qafqaz boru kəmərinə (qaz) və Bakı-Tbilisi-Ceyhan boru kəmərinə (kondensat) nəql etməklə, qazın və kondensatın terminala tədarükü nəzərdə tutulub. "Şahdəniz"də ilk qaz hasilatı 2006-cı il noyabrın sonunda başlayacaq.