Azərbaycan, Bakı, 22 yanvar / Trend, müxbir H.Vəliyev/
İlin birinci yarısının ortalarında Naxçıvan Muxtar Respublikasında (NMR) elektron rəqəmsal imzaların sertifikatlaşdırılması mərkəzinin işə salınması planlaşdırılır. Bu barədə Naxçıvan MR Rabitə və İnformasiya Texnologiyaları Nazirliyinin məlumatında deyilir.
Nazirliyin məlumatına görə, göstərilən dövrdə habelə "Elektron hökumət" portalının işə salınması da nəzərdə tutulub.
Hazırda muxtar respublikanın 73 dövlət orqanı internet resurslara malikdir. Elektron xidmətlərin göstərilməsi üçün Naxçıvan MR Rabitə və İnformasiya Texnologiyaları Nazirliyi tərəfindən 34 dövlət orqanına reyestr nömrələri verilib, xidmətlər reqlamentinin hazırlanması üçün onlara lazımi yardımın göstərilməsi davam edir.
2012-ci ildə NMR telekommunikasiya şəbəkəsinin yenilənməsi üzrə işlər çərçivəsində optik-lif rabitə xətti üzrə 30 ATS-də birləşdirici xətlərin əvəzlənməsi işləri görülüb.
NMR ərazisində yaradılan elektron ATS-lərin ümumi sayı 124 ədəd təşkil edir ki, bunlardan 101-i öz aralarında optik xətlərlə birləşdirilib.
Naxtel infrastrukturunda baza stansiyalarının sayı artırılıb, buna görə də stasionar şəbəkənin nömrə həcmi 1616, simsiz 808 ədədədək artırılıb. Hazırda Naxçıvanda hər 100 ailəyə 66 stasionar telefon düşür.
