Azərbaycan, Bakı, 5 mart /Trend, müxbir R.Hafizoğlu/
Azərbaycanın "İnvest-AZ" şirkəti öz səhmlərini İstanbul Fond Birjasına çıxarmaq niyyətindədir. Bunu şirkətin Direktorlar Şurasının sədri Elşən Quliyev bildirib. Trend-in məlumatına görə, xəbəri çərşənbə günü Türkiyənin "Sabah" qəzeti yayıb.
Qəzetin məlumatına görə, "İnvest-AZ" şirkəti ilə yanaşı Azərbaycanın adları açıqlanmayan daha iki şirkətinin qiymətli kağızları İstanbul Fond Birjasına daxil olacaq.
"İnvest-AZ" şirkətinin fəaliyyətinin əsas məqsədi Azərbaycanda, eləcə də Türkiyədə sərmayəçilər üçün əlverişli şərait yaratmaqdır.
Şirkət Azərbaycanda diler və broker lisenziyalarına malikdir.
"İnvest-AZ" MMC ötən il Bakı Fond Birjası vasitəsi ilə Forex və CFD bazaralrında ticarət zamanı ilk likvidlik provayderi olub.
"İnvest-AZ" 2013-cü il sentyabrın 23-də BFB-nin üzvü, sentyabrın 17-də isə birjanın sərmayədarı olub. "İnvest-AZ" şirkəti 2006-cı il yanvarın 11-də yaradılıb. Şirkət həmçinin İstanbul birjasının səhmdarıdır.
İstanbul Fond Birjası və Qızıl birjasının birləşməsindən sonra İstanbul birjası (BIST) 2013-cü il aprelin 5-dən fəaliyyətə başlayıb.