Azərbaycan, Bakı, 5 sentyabr /Trend, müxbir Zülfiyyə Qurbanova/
Azərbaycanda onlayn ödəniş xidmətləri provayderi "GoldenPay"in səhmdarları Azərbaycan tarixində ilk IPO-nun (ilkin açıq yerləşdirmə) keçirilməsi haqqında qərar qəbul ediblər. Trend-in şirkətə istinadən verdiyi məlumata görə, bu barədə qərar "GoldenPay"in səhmdarlarının növbədənkənar iclasında qəbul olunub.
Məlumatda qeyd edilir ki, iclasda növbəti 5 il üçün şirkətin inkişaf strategiyası və onun icra mexanizmləri müzakirə edilib: "Səhmdarlar bu strategiyanın icra edilməsi üçün tələb olunan maliyyə resursları hissələrinin öz səhmlərinin açıq yerləşdirilməsi yolu ilə cəlb edilməsi haqqında qərar qəbul ediblər".
Bununla əlaqədar "GoldenPay"in İdarə Heyətinə IPO-nun şərtlərinin müəyyənləşdirilməsi və digər investisiya bank xidmətlərinin əldə edilməsi üzrə "Paşa Bank" ASC ilə sazişin imzalanması üçün səlahiyyət verilib.
"Paşa Capital" şirkətinin direktoru Ceyhun Hacıyev cümə günü Trend-ə deyib ki, sazişin imzalanması vaxtı və IPO-nun həcmi (açıq yerləşdirməyə çıxarılan səhmlər paketi) hələ məlum deyil: "İmzalanma tarixi hələ müəyyən edilməyib. IPO-nun məbləği də bəlli deyil. Biz hazırda "GoldenPay" şirkəti ilə danışıqlar aparırıq. Yerləşdirmənin həcmini şirkətin özü müəyyənləşdirməlidir".