Azərbaycan, Bakı, 19 sentyabr /Trend, müxbir Azad Həsənli/
Azərbaycanın "GoldenPay" şirkəti qarşıdakı IPO çərçivəsində şirkətin səhmlərinin alış-satışını internetlə həyata keçirməyin mümkün olacağı informasiya sistemi hazırlayır. Bunu cümə günü Trend-ə şirkətin baş direktoru Fərid İsmayılzadə deyib.
"GoldenPay" 2014-cü ilin sonunadək Azərbaycan tarixində ilk IPO-nun (şirkət səhmlərinin ilkin açıq yerləşdirilməsi) keçirilməsinə hazırlaşır.
Onun sözlərinə əsasən, bu, qeyri-adi "Forex sistem"dir: "Onun sayəsində istənilən insan onlayn rejimdə brokerlərlə müqavilələr imzalaya bilər. Biz istəyirik ki, istənilən səhmdar "Asan imza" mobil rəqəmsal imza ilə sayt vasitəsilə müqaviləni (şirkətin səhmlərinin alış-satışı haqqında) imzalaya və ya müqavilənin elektron variantını kompüterinə yükləyə, onu möhürləyə və imzalayaraq "Paşa Kapital" ASC-yə (IPO-nun yerləşdirilməsi üzrə şirkətin marketmeykeri) göndərə bilsin".
F.İsmayılzadə qeyd edib ki, hazırda sistem sınaqdan keçirilir və tez bir zamanda hazır olacaq: "Şirkət mövcud sistemin "Paşa Kapital"da quraşdırılması barədə ASC ilə müzakirələr aparır".