Bakı. Elçin Mehdiyev - Trend:
Bizim ölkəmizdə pandemiya səbəbindən ən çox fəsadlar təhsil və səhiyyə sahəsinə dəyib. Biz təhsil və səhiyyə sistemlərini təkmilləşdirməliyik.
Trend-in məlumatına görə, bunu Ekvadorun keçmiş prezidenti Rosalia Arteaqo Serrano VIII Qlobal Bakı Forumu çərçivəsində “Yeni dünya iqtisadiyyatı” mövzusuna panel müzakirələri zamanı deyib.
O qeyd edib ki, ölkəsində bütün əhalini peyvənd etməyə böyük cəhdlər göstərilir: “Bəzi insanlar vaksinasiyaya fərdi mövqedən yanaşaraq bundan imtina edirlər. Lakin bu məsələyə fərdi mövqedən deyil, ümumi cəmiyyətin maraqları prizmasından yanaşmaq lazımdır”.
Keçmiş prezident post-pandemiya dövründə dünya iqtisadiyyatını bərpa etmək üçün bütün ölkələrin birgə səylərinin vacibliyini qeyd edib.