Bakı. Trend:
Bu il yay mövsümü ərzində daxili turizmdə artım qeydə alınıb.
Trend xəbər verir ki, bunu Dövlət Turizm Agentliyinin sədrinin müşaviri Kənan Quluzadə təmsil etdiyi qurumun Şüvəlan qəsəbəsindəki çimərliklərə təşkil etdiyi mediatur zamanı deyib.
O bildirib ki, illik göstəricilərə nəzər salınsa, ötən il daxili səfərlərin sayı 23 milyon nəfər təşkil etmişdisə, bu ilin sonuna bu rəqəmin 25 milyona çatacağı gözlənilir:
"Bu artımın təxminən 40%-i yay mövsümünə təsadüf edir. Bu ilin yeddi ayında Azərbaycana 1,478 milyon xarici vətəndaş səfər edib. Bu ilin 8 ayının nəticələrində isə bu rəqəmin 1,7 milyonu ötəcəyini gözləyirik. Ötən illə müqayisədə Azərbaycana gələnlərin sayında 1-2% azalma olub. Bu da, əsasən, regionda baş verən geosiyasi dəyişikliklər və münaqişələrlə bağlıdır".
"Rusiya və Hindistandan Azərbaycana gələnlərin sayında azalma ümumi statistik göstəricilərdə özünü göstərib.
Bundan əlavə, Yaxın Şərqdəki qarşıdurmalar Azərbaycana uçuşların sayına təsir göstərib.
Hazırda bərpa prosesi gedir ki, digər bazarların hesabına ölkə turizimində dayanıqlılığı təmin edə bilək", - deyə K.Quluzadə qeyd edib.