Bakı. Trend:
Bu ilin avqustun 1-nə Azərbaycan iqtisadiyyatına cəmi kredit qoyuluşunun (bank və qeyri-bank birlikdə) həcmi 30,257 milyard manat təşkil edib.
Trend bu barədə Mərkəzi Bankdan məlumat əldə edib.
Məlumata görə, banklar və qeyri-banklar tərəfindən ölkə iqtisadiyyatına kredit qoyuluşunun həcmi bir ay əvvələ nisbətən 26,1 milyon manat və ya 0,1%, 2024-cü ilin avqustun 1-nə nisbətən isə 3 milyard manat və ya 11% artıb.
Hesabat dövründə kredit qoyuluşunun 7,4 milyard manatı dövlət banklarının payına düşüb ki, bu da aylıq müqayisədə 49 milyon manat və ya 0,6% azalma, illik müqayisədə isə 763,7 milyon manat və ya 11,5% artım deməkdir.
Bəhs olunan dövrdə iqtisadiyyata kredit qoyuluşlarının 21,098 milyard manatı özəl bankların payına düşüb. Bu isə cari ilin iyulun 1-nə olan göstərici ilə müqayisədə 75,1 milyon manat və ya 0,3%, ötən illin avqustun 1-nə olan göstəriciyə nisbətən isə 2,040 milyard manat və ya 10,7% çoxdur.
Bundan başqa, bu ilin avqustun 1-nə ölkə iqtisadiyyatına kredit qoyuluşlarının qeyri-bank kredit təşkilatlarına düşən payı 1,759 milyard manat olub ki, bu da, aylıq müqayisədə dəyişməz qalıb, ötən ilin eyni dövrü ilə müqayisədə isə 185,9 milyon manat və ya 11,8% artıb.
Qeyd edək ki, hesabat dövründə dövlət bankları tərəfindən kredit qoyuluşu ümumi kredit qoyuluşunun 24,5%-ni, özəl banklar tərəfindən kredit qoyuluşu ümumi kredit qoyuluşunun 69,7%-ni, bank olmayan kredit təşkilatları tərəfindən qoyulan kredit qoyuluşu ümumi kredit qoyuluşunun 5,8%-ni təşkil edib.