Bakı. Trend:
“Apple” və “Samsung” şirkətləri Çinin “Xiaomi” şirkətinə qarşı şikayət edərək, Hindistanda markaların məhsullarının birbaşa "Xiaomi" cihazları ilə müqayisə edildiyi reklam kampaniyasını dayandırmasını tələb ediblər.
Trend-in məlumatına görə, bu barədə "The Economic Times" nəşri xəbər verib.
"Xiaomi"nin reklam kampaniyası Hindistanda həm ənənəvi, həm də rəqəmsal medianı əhatə edib. “Economic Times” qəzetinin ön səhifəsində "Think different? Think again“ ("Fərqli düşünürsəz"? Bri daha düşün") başlığı ilə “Xiaomi Pad 7” planşetinin reklamı dərc olunub. Burada "Xiaomi Pad 7" birbaşa "iPad Pro" ilə müqayisə olunur.
Sosial şəbəkələrdə "iPhone 16 Pro Max" kamerasının "Xiaomi 15 Ultra" kamerası ilə müqayisə olunması da paylaşılır və üstünlük Çin cihazına verilir.
"Xiaomi" sosial mediada "Samsung"a qarşı oxşar strategiyanı qəbul edərək Koreya texnologiya nəhənginin bir neçə modelini birbaşa tənqid edib. Rəsmi şərhlərdə "Apple" və "Samsung" nümayəndələri kampaniyanı "alçaldıcı" adlandırdılar və Xiaomi hazırkı marketinq strategiyasından əl çəkməsə, məhkəməyə müraciət etmək niyyətində olduqlarını söylədilər.