Azərbaycan, Bakı, 27 oktyabr / Trend , müxbir C.Babayeva/ Müxalif Azərbaycan Milli İstiqlal Partiyası (AMİP), partiya fəalının pozulmuş hüquqlarının bərpa olunması üçün Avropa İnsan Haqları Məhkəməsinə müraciət edib.
Partiyadan Trend - a bazar ertəsi daxil olan məlumata əsasən, AMİP İmişli rayon təşkilatının fəalı Musa Rahim evinin damını sökərək hökumət əleyhinə şüarlar yazdığına, aclıq aksiyası keçirdiyinə görə, 2007- ci ilin avqustunda Cinayət Məcəlləsinin 221.22 (dövlət qulluqçusuna qarşı xuliqanlıq) və 315- ci maddələri (ictimai qaydanı kobud surətdə pozmaq) ilə cinayət işi qaldırılmışdı. Musa Rahim 2007- ci ilin noyabrında rayon məhkəməsinin qərarı ilə beş il müddətinə azadlıqdan məhrum edilib. Məhkəmə hökmündən apellyasiya və kassasiya şikayətləri verilsə də, çıxarılmış hökm dəyişməz qalıb.
Trend - un arayışı: AMİP 1992 - ci ildə yaradılan və Azərbaycanda dövlət qeydiyyatına alınan ilk partiyadır. Müxalifəti təmsil edən AMİP-in qurucusu və 2004 - cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə saxlamaq üçün ünvan: [email protected]