Azərbaycan, Bakı, 24 may /Trend, müxbir M.Əliyev/
"Amnesty International" və "Human Right Watch" kimi beynəlxalq təşkilatların hər hansı əsaslı məlumatlara söykənmədən, bir neçə nəfərin fikrinə istinad etməklə hazırladıqları hesabatlar həmin təşkilatların özlərini nüfuzdan salan ən böyük amildir. Bu barədə Trend-ə Azərbaycan Tələbə Gənclər Təşkilatları İttifaqının (ATGTİ) sədri Şahin İsmayılov bildirib.
Onun sözlərinə görə, ölkədəki real vəziyyəti öyrənmək istəyən təşkilat sorğu keçirməli, universitetlərdə görüşlər aparılmalıdır.
"Yalnız bir neçə nəfərin fikri yayılırsa, bu, reallığı əks etdirmir. Onların nüfuzlu təşkilat olması onda görünər ki, əsaslandırılmış, faktlara söykənən, geniş sorğu keçirilən və ölkənin reallıqlarına əsaslanan məlumatlar yaysınlar", - o deyib.
İsmayılov həmçinin qeyd edib ki, hazırda Azərbaycan "Eurovision" müsabiqəsinə ev sahibliyi edir və olduqca möhtəşəm təşkilatçılıq göz önündədir.
"Azərbaycanın cəmi 20 illik müstəqillik tarixi var, lakin biz 20 illərə sığmayan hadisələrə şahidlik edirik. Bu onu göstərir ki Azərbaycan güclü dövlət kimi inkişaf edir, bir sıra regional layihələri həyata keçirir, beynəlxalq layihələri uğurla icra edir", - o deyib.
O, bütün bunların fonunda Azərbaycana ləkə yaxmaq istəyənlərin olmasını qeyd edərək bildirib ki, ölkə gücləndikcə düşmənləri də çoxalır.