Bakı. Trend:
Azərbaycan Gürcüstan üçün dəyərli tərəfdaş və qonşudur.
Trend cümə günü xəbər verir ki, bunu Gürcüstanın baş naziri İrakli Qaribaşvili BMT-nin Mərkəzi Asiya İqtisadiyyatları üzrə Xüsusi Proqramının (SPECA) Bakıda keçirilən sammitində çıxışında deyib.
"Ölkələrimiz arasındakı dostluğun tarixi uzun əsrlərə söykənir, ölkələrimizi bir-biri ilə mehriban qonşuluq əlaqələri bağlayır", - o deyib.
Onun sözlərinə görə, bu il Azərbaycanla Gürcüstan arasında ticarət dövriyyəsinin həcmi 16 faiz artaraq 1,2 milyard dollara çatıb.
Qaribaşvili vurğulayıb ki, Gürcüstan Azərbaycan və Mərkəzi Asiya regionu ilə tərəfdaşlığını daha da gücləndirməyə çalışır.
Qeyd edək ki, noyabrın 24-də Bakıda BMT-nin Mərkəzi Asiya İqtisadiyyatları üzrə Xüsusi Proqramının (SPECA) 25 illiyinə həsr olunan sammit keçirilir.
Hazırda SPECA-nın üzv ölkələri Azərbaycan, Əfqanıstan, Qazaxıstan, Qırğızıstan, Tacikistan, Türkmənistan və Özbəkistandır.
26 mart 1998-ci ildə təsis olunan SPECA BMT-nin bu ölkələrə iqtisadi inkişafda yardım göstərilməsi, əməkdaşlıq, Avropa və Asiya iqtisadiyyatına inteqrasiya üzrə xüsusi proqramı qismində çıxış edir. SPECA regional əməkdaşlıq yolu ilə daha yaxşı əldə edilə biləcək dayanıqlı inkişaf məqsədlərinə (DİM) nail olmaq üçün subregional platforma təklif edir.