Bakı. Trend:
Dünən biz Milli Məclisin Azərbaycanda keçirilən növbədənkənar parlament seçkilərində müşahidəçi kimi iştirak edirdik.
Trend xəbər verir ki, bunu Gürcüstan parlamentinin üzvü, beynəlxalq müşahidəçilərdən ibarət nümayəndə heyətinin rəhbəri İrakli Kadaqişvili növbədənkənar parlament seçkiləri ilə bağlı keçirilən brifinqdə deyib.
O bildirib ki, Azərbaycan və Gürcüstan arasında sıx dostluq münasibətləri mövcuddur.
"Bizim müşahidəçi qrupumuz 8 seçki məntəqəsində olub. Hər məntəqədə seçki prosesi qanunauyğun təşkil olunmuşdu və qaydalara uyğun baş tutdu. Biz heç bir qanun pozuntusu ilə qarşılaşmamışıq. Eyni zamanda, komissiya tərəfindən də heç bir pozuntu qeydə alınmayıb", - deyə o qeyd edib.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.
Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.
