Azərbaycan, Bakı, 13 iyun / Trend , müxbir İ.Əlizadə/ Azərbaycan parlamentində hakim Yeni Azərbaycan Partiyasını təmsil edən deputat hesab edir ki, ölkənin təhsil haqqında yeni qanun layihəsinin hazırlanması üçün prezident İlham Əliyevin yanında xüsusi komissiya yaradılmalıdır. "Əgər "Təhsil haqqında" qanun layihəsi prezident İlham Əliyev tərəfindən parlamentə göndərilməsə, bu qanunu qəbul etmək mümkün olmayacaq. Cünki təhsil haqqında yeni qanun layihəsini hazırlayan şəxslər öz maraqlarını güdürlər və xalqın maraqlarına cavab verən layihə hazırlamaq mümkün olmur", - deyə cümə günü jurnalistlərə açıqlamasında hakim Yeni Azərbaycan Partiyası icra katibinin müavini, deputat Siyavuş Novruzov bildirib.
Azərbaycanda hazırda qüvvədə olan "Təhsil haqqında" qanun 1992-cü ildə qəbul olunub və 1995-ci ildə təhsil haqqında yeni qanun layihəsinin hazırlanmasına başlanılıb. Lakin parlament, Təhsil Nazirliyi, Tələbə Qəbulu üzrə Dövlət Komissiyası, ali təhsil müəssisələri, Maliyyə və Vergilər nazirlikləri arasında olan fikir ayrılıqına görə, qanun layihəsini qəbul etmək mümkün olmayıb. 2007-ci il dekabrın sonunda təhsil haqqında yeni qanun layihəsi parlamentdə birinci oxunuşdan keçib. Qanun layihəsinin qəbul edilməsi parlamentin yaz sessiyasının gündəliyinə daxil edilib. Sessiya başa çatsa da, qanun layihəsi ikinci oxunuşda müzakirəyə çıxarılmayıb.
Novruzov bildirib ki, parlamentdə birinci oxunuşdan keçən qanun layihəsi müasir dövrün tələblərinə cavab vermir: "Ali məktəb rektorları və digər vəzifəli şəxslər elə bilirlər ki, ömürlərinin sonuna qədər vəzifədə qalacaqlar və qanunda özlərinə əlavə səlahiyyətlərin verilməsini tələb edirlər. Lakin qanun heç kimin deyil, xalqın maraqlarına cavab verməlidir".