Azərbaycan, Bakı, 17 oktyabr / Trend / Azərbaycan klassik poeziyasının antologiyası alman dilində nəşr edilib.
Almaniyada Nizami Gəncəvi adına Mədəniyyət İnstitutunun direktoru Nuridə Atəşin Trend -a verdiyi məlumata görə, antologiyada 40-dan artıq şair haqqinda məlumatlar yer alıb.
Nizami Gəncəvi, Fizuli, Nəsimi, Məhsəti Gəncəvi, Xətai kimi dahi şairlərlə birgə sufi və hurufi şairlərə - Nəimi, Xəlili, Gülşəniyə də antologiyada xatirlanıb.
Atəş bildirib ki, antologiyanın ən böyük uğurlarından biri də indiyə qədər bütünlükdə Avropanın yetişdirə bilmədiyi qədər qadın şairələrini məhz Azərbaycanın yetişdirə bilməsi faktının çatdırılmasından ibarətdir. Kitabın sonunda isə müasir şairlərdən də kiçik örnəklər verilib.
Kitab Almaniyanın "Mattes and Seitz" adlı nəşriyyatında dərc olunub. Nizami Gəncəvi adına Mədəniyyət İnstitutu tərəfindən nəşrə hazırlanıb "Pərvanə və şam - Azərbaycanın minillik məhəbbət poeziyası" adlanan antologiya oktyabrın 15-də Frankfurt şəhərində açılan dünyanın ən böyük kitab sərgisində alman oxucularının ixtiyarına verilib. Kitabın tərcüməçiləri şairə Nuridə Atəş və alman şair Jan Vaynertdir. Ən yaxın zamanda paytaxt Berlində bir neçə rəsmi qurumların təşkilatçılığı altında antologiyanın yüksək səviyyədə təqdimatı keçiriləcək.
Antologiyanı "Odlar diyarından gələn duyğuların karvanı" adlandıran Atəş "Almaniyanın duyğulara ehtiyacı var" adlı devizi ilə mətbuatda kampaniya başlandığını deyib.
Müəlliflə əlaqə saxlamaq üçün: [email protected]