Azərbaycan, Bakı, 8 may /Trend, müxbir İ.İsabalayeva/
"Eurovision 2012" mahnı müsabiqəsi ilə əlaqədar Bakının bir çox səhiyyə müəssisələri gücləndirilmiş iş rejimində fəaliyyət göstərəcək.
Trend-in Səhiyyə Nazirliyinin mətbuat xidmətinə istinadən verdiyi məlumata görə, görülən işlər və müsabiqədə iştirak üçün ölkəyə gələcək qonaqların tibbi təminatını müzakirə etmək məqsədilə səhiyyə naziri Oqtay Şirəliyevın rəhbərliyi ilə xüsusi toplantı keçirilib.
"Eurovision 2012" müsabiqəsinin iştirakçılarının və qonaqların tibbi təminatı barədə məlumat verən Bakı Şəhər Baş Səhiyyə İdarəsinin rəis müavini Rauf Nağıyev mahnı müsabiqəsinin Bakı şəhərində keçirilməsi haqqında Azərbaycan Prezidentinin 19 may 2011-ci il tarixli, Səhiyyə Nazirliyinin 19 aprel 2012-ci il tarixli müvafiq sərəncamlarını icra etmək və müsabiqə iştirakçılarına, qonaqlara tibbi xidməti təşkil etmək məqədilə müvafiq tədbirlər görüldüyünü bildirib.
Belə ki, 13-20 may 2012-ci il tarixlərində keçiriləcək məşqlər, 21-26 may 2012-ci il tarixlərində keçiriləcək müsabiqə zamanı ehtiyac olduğu halda lazımi tibbi xidmət göstərilməsi üçün 200 nəfər tibb işçisi xüsusi hazırlıq keçib, müvafiq şöbələr üzrə 103 çarpayı ayrılıb.
Nağıyev bildirib ki, Klinik Tibbi Mərkəzdə bütün şöbələr üzrə (terapiya, nevrologiya, kardiologiya, reanimasiya, uşaq və böyüklər üçün travmatologiya, cərrahiyyə, o cümlədən üz-çənə cərrahiyyəsi, toksikologiya, doğum, ginekologiya və yoluxucu) 40 nəfər həkim xarici dil üzrə müvafiq kurs keçib. 2 nömrəli Uşaq Klinik Xəstəxanasında da bütün şöbələr üzrə (pediatriya, yoluxucu, o cümlədən meningit, reanimasiya və otolorinqoloji) 10 nəfər həkim xarici dil üzrə müvafiq kurs keçib. 5 nömrəli Şəhər Klinik Xəstəxanasında isə yanıq və reanimasiya şöbələri üzrə 4 nəfər həkim xarici dil üzrə müvafiq kurslar keçib.
5 nömrəli Doğum Evində bütün şöbələr üzrə (reanimasiya, doğum və ginekologiya) 5 nəfər həkim xarici dil üzrə müvafiq kurs keçib.
Bakı şəhər TTTYS tərəfindən ayrılmış 31 təcili yardım briqadası növbədə olacaq. Onlardan 13 briqada mehmanxanalarda, 11 briqada (məşqlər zamanı, 7 - müsabiqə zamanı, əlavə 4) "Kristal Zal"da, 5 briqada (məşqlər zamanı 4, müsabiqə zamanı əlavə 1) Əl Oyunları İdman Sarayında, 2 briqada isə Dənizkənarı Parkda növbə çəkəcək. Bu briqadaların 104 həkimi və 37 orta tibb işçisi xarici dil üzrə müvafiq kurs keçib.
Tədbirdə Respublika Gigiyena və Epidemiologiya Mərkəzinin nümayəndələri tərəfindən iaşə müəssisələrində sanitariya qaydalarına ciddi riayət olunmasına nəzarətin təmin olunacağı haqqında da məlumat verilib.
Sonda nazir Şirəliyev belə bir tədbirin ölkəmizdə keçirilməsinin əhəmiyyətindən danışıb və bu tədbirin uğurlu, yaddaqalan olması üçün bütün səylərdən istifadə olunmasının vacibliyini vurğulayıb.