Bakı. Trend:
Azərbaycan dövlət büdcəsində gömrük gəlirlərinin payı qeyri-neft gəlirlərinin 35 faizini təşkil edir.
Trend xəbər verir ki, bunu Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov Bakıda keçirilən "Gömrük-Biznes Forumu 2023" (GBF23) tədbirində deyib.
Onun sözlərinə görə, xarici ticarətin artması ölkə büdcəsinə daxilolmaların artması ilə nəticələnib.
"Burada gömrük orqanlarının fəaliyyətindəki çevik, müasir və şəffaf idarəetmə metodlarını qeyd etmək yerinə düşər. Gömrük nəzarətinin təkmilləşdirilməsi, ticarətin asanlaşdırılması, "kölgə iqtisadiyyatı"nın likvidasiyası, sabit, avtomatlaşdırılmış və vətəndaşları qane edən xidmətlərin təşkili sayəsində görülən irimiqyaslı tədbirlər xüsusi yer tutur", - deyə o qeyd edib.
Xatırladaq ki, 2023-cü ilin yanvar-oktyabr ayları ərzində Dövlət Gömrük Komitəsinin (DGK) xətti ilə Azərbaycanın dövlət büdcəsinə daxilolmalar 2022-ci ilin analoji dövrü ilə müqayisədə 12,68 faiz artaraq 5,235 milyard manata çatıb.
2023-cü ilin hesabat dövründə gömrük rüsumlarından dövlət büdcəsinə daxilolmalar 19,31 faiz (219,643 milyon manat) artaraq 1,356 milyard manat olub.
Hesabat dövründə ƏDV daxilolmaları 3,655 milyard manat (2022-ci ilin analoji dövrü ilə müqayisədə 10,01 faiz), aksiz daxilolmaları 186,651 milyon manat (39,35 faiz artım), yol vergisindən daxilolmalar isə 36,513 milyon manat (30,59 faiz) olub.
Qeyd edək ki, Ümummilli Lideri Heydər Əliyevin 100 illiyinə həsr olunmuş silsilə tədbirlər çərçivəsində noyabrın 20-də Bakıda "Gömrük-Biznes Forumu 2023" keçirilib.
Forumun əsas məqsədi gömrük və biznes əməkdaşlığına Komitənin korporativ hesabatı, görüləcək işlərin anonsu və gerçəkləşdirilən layihələrdə fəal iştirak üçün biznes subyektlərinə çağırış, habelə yeni xidmət və məhsulların faydasından bəhs ediləcək işgüzar ortam yaratmaqdır.
(Tərcümə: Rəna Əbdürəhmanova)