Azərbaycan, Lənkəran, 15 fevral / Trend müxbir P. Əliyeva /Lənkəran dağ kəndi olan və rayon mərkəzindən 20 kilometr aralıda yerləşən Daşdatükdə iribuynuzlu mal - qara arasında kütləvi tələfat faktları müşahidə edilir. Son bir ayda 12 təsərrüfatda 30 -dan çox iribuynuzlu mal - qara tələf olub. Hətta bir ailənin on baş iribuynuzlu mal - qarası tələf olub. Tələf olan heyvanlar kənd ərazisində basdırılır .
Kənd sakinləri bildirirlər ki , heyvanları yemlək üçün meşələrə aparırlar. Meşədən qayıdan mal - qara arasında halsızlıq müşahidə olunub, onların ayaqları tutulub və iflic olub . Xəstəliyə tutulan heyvanlar üç gün müddətində tələf olur. Tələf olan heyvanların əksəriyyəti də boğaz (balası olanlar) olanlardır.
Bununla əlaqədar kənd sakinləri Lənkəran rayon baytarlıq idarəsinə müraciət ediblər.
Lənkəran rayon baytarlıq idarəsinin müdiri Kamal Abdinov kənd sakinlərinin müraciətinə əsasən həmin kəndə getdiklərini, hətta bir heyvanın tələfatının şahidi olduqlarını bildirib. "Həmin heyvanın bır hissəsi müayinə məqsədilə Zona baytarlıq laboratoriyasına göndərilib. Analizin nəticələrinə əsasən hər hansı bir infeksion xəstəlik və ya zəhərli bir maddə aşkar edilməyib. Heyvanlardakı xəstəlik sərt keçən soyuq hava şəraitindən və heyvanların vaxtaşırı yemlənməməsindən əmələ gəlib"- deyə Abdinov vurğulayıb.
Lakin kənd sakinləri bu fikirlərlə razılaşmırlar: "Heyvanlar üçün ayrılan dava- dərman onlara verilmir, mal - qara vaxtında peyvənd edilmir. Soyuqdan və yemin çatışmazlığından mal - qara tələf ola bilməz".
Bu hadisələrdən sonra həyətlərdəki toyuq - cücə arasında da kütləvi tələfat halları müşahidə olunmağa başlayıb .