Bakı. Trend:
Azərbaycan Dövlət Neft Şirkəti (SOCAR) beynəlxalq keyfiyyət idarəetməsi sahəsində nüfuzlu təşkilatlardan biri olan “Chartered Quality Institute” (CQI) ilə korporativ tərəfdaşlıq əlaqələri qurub.
Bu barədə Trend SOCAR-a istinadən xəbər verir.
Bildirilib ki, SOCAR-ın CQI ilə korporativ tərəfdaşlığı şirkətin keyfiyyətin idarə olunması və əməliyyat proseslərində beynəlxalq standartlara uyğunluq istiqamətində atdığı strateji addımlardan biridir.
Qeyd olunub ki, bu tərəfdaşlıq SOCAR əməkdaşlarının qlobal təcrübələrdən, o cümlədən dünyanın aparıcı təşkilatlarının istifadə etdiyi qabaqcıl keyfiyyət idarəetmə metodologiyalarından, CQI və “International Register of Certificated Auditors” (IRCA) tərəfindən təsdiqlənmiş təlim və sertifikatlaşdırma imkanlarından faydalanmalarına imkan verəcək. Həmçinin SOCAR-ın beynəlxalq arenada etibarlı, şəffaf və keyfiyyətə önəm verən korporativ lider kimi mövqeyini daha da gücləndirəcək.
Vurğulanıb ki, əməkdaşlıq, eyni zamanda şirkətin sosial məsuliyyət, sənaye təhlükəsizliyi, ətraf mühitə təsirlərin azaldılması və daxili potensialın inkişafı kimi sahələrdə fəaliyyətinin daha da gücləndirməsinə imkan yaradacaq.
Sonda qeyd olunub ki, CQI-nin əsas məqsədi müəssisələrin effektivliyini, dayanıqlığını və müştəri məmnuniyyətini artırmaq üçün strukturlaşdırılmış keyfiyyət idarəetmə yanaşmalarının tətbiqini təşviq etməkdir.