Azərbaycan, Bakı, 30ktyabr / Trend , müxbir K.Zərbalıyeva/ Azərbaycan ordusunun Gədəbəy rayonu ərazisindəki N saylı hərbi hissəsinin əsgəri Həsən Allahverdiyev dözümsüzlük göstərərək postda özü-özünü güllələyib.
Bu barədə Müdafiə Nazirliyinin mətbuat xidmətinin rəhbəri Eldar Sabiroğlu cümə axşamı Trend -a məlumat verib.
Hərbi mənbələrin məlumatına gürə, əsgər komandiri tərəfindən güllələnib.
Əsgərin komandiri Allahverdiyevdən onun telefonuna kontur yükləməsini tələb edib. Allahverdiyev isə buna maddi imkanının olmadığını deyib.
Bundan sonra çavuş avtomatdan atəş açaraq arxadan əsgərə bir neçə güllə vurub.
Sabiroğlunun sözlərinə görə, hərbi hissə rəhbərliyi əsgərdən heç nə ummayıb. Allahverdiyevin bir neçə gündür posta göndərildiyini deyən mətbuat xidmətinin rəhbəri bildirib ki, əsgərə heç bir təzyiq göstərilməyib. " Sadəcə əsgər iradəsizlik göstərərək postda özünü xidməti silahı ilə güllələyib", - deyə Sabiroğlu bildirib.
Ağır xəsarət alan əsgər hərbi hospitala yerləşdirilib.
Mətbuat xidmətinin rəhbəri faktla bağlı Hərbi Prokurorluqda cinayət işi açıldığını deyib.
18 yaşlı Allahverdiyev bu ilin iyul ayında Mingəçevir şəhər Hərbi Komissarlığından hərbi xidmətə çağırılıb.
Müəlliflə əlaqə saxlamaq üçün elektron ünvan- [email protected]