Bakı. Trend:
2015-ci ildən bəri ilk dəfə Almaniyada işsizlik səviyyəsi psixoloji həddi aşaraq üç milyon nəfəri keçib.
Trend-in DW-yə istinadən məlumatına görə, Federal Məşğulluq Agentliyinin (BA) avqustun 29-da açıqladığı hesabata əsasən, işsizlərin sayı 46 min artaraq 3,025 milyona çatıb. Nəticədə işsizlik səviyyəsi 0,1 faiz bəndi yüksələrək 6,4 faiz olub.
“Avqust ayında gözlədiyimiz baş verdi: işsizlik yay mövsümü ilə əlaqədar üç milyondan yuxarı qalxdı”, – deyə şöbə müdiri Andrea Nales bildirib.
O, əmək bazarının hələ də son illərin iqtisadi tənəzzülündən əziyyət çəkdiyini vurğulayıb.
Mövsümi düzəlişlər nəzərə alındıqda, avqustda işsizlərin sayı iyulla müqayisədə 9 min nəfər azalıb. Halbuki analitiklər əksinə, 10 min nəfər artım gözləyirdilər. İllik müqayisədə isə işsizlərin sayı 153 min nəfər çoxalıb.