Azərbaycan, Bakı, 3 fevral /Trend, müxbir K.Zərbalıyeva/
Azərbaycanda rayonlara gedən iri magistrallarda nəqliyyatın hərəkəti bərpa olunub.
Respublika Baş Dövlət Yol Polisi İdarəsinin şöbə rəisi Kamran Əliyev cümə günü Trend-ə bildirib ki, Şəki-Balakən-Zaqatala, İsmayıllı-Muğannı yolunda hazırda qar yağır. Buna baxmayaraq, yolda nəqliyyatın hərəkəti məhdudlaşmayıb.
Bakı-Şamaxı-Yevlax yolu və Ağsu aşırımında yolun hərəkət hissəsinə qarın çox yağması səbəbindən nəqliyyatın hərəkətində qismən məhdudlaşma var.
Əliyev bildirib ki, digər istiqamətlərə gedən yollar da buz bağlayıb, lakin həmin yollarda nəqliyyatın hərəkəti məhdudlaşmayıb.
Onun sözlərinə görə, dünən respublikada 6 yol qəzası qeydə alınıb, 2 nəfər ölüb, 5 nəfər yaralanıb. Ölümlə nəticələnən iki hadisə piyadanın vurulması olub.
Baş İdarə şaxtalı havalarda nəqliyyat vasitələrini idarəetmə təcrübəsi olmayan sürücülərə bu günlərdə şəxsi nəqliyyat vasitələrindən az istifadə etmələrini, buzlu yollarda zənciri, mövsümi qış təkərləri və hər iki oxu aparıcı olan avtomobillərin hərəkətini məsləhət görür.
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosundan daha əvvəl Trend-ə verilən məlumata görə, Bakıda şaxtalı hava şəraiti fevralın 5-dək hökm sürəcək.
Fevralın 3-də Bakıda buludlu hava şəraiti üstünlük təşkil edəcək. Gündüz yağıntının tədricən kəsiləcəyi gözlənilir. Şimal-qərb küləyi saniyədə 15-20 metr, arabir 23-25 metr sürətlə əsəcək, günün ikinci yarısında saniyədə 9-14 metrədək zəifləyəcək.