Azərbaycan, Bakı, 4 oktyabr / Trend müxbir M.Əliyev/
Bakının Qaradağ rayonu Lökbatan qəsəbəsindəki Milli Qəhraman Səxavət Məmmədov adına 106 saylı tam orta məktəbdə daxili işlər nazirinin müvafiq əmrinə əsasən, respublikada keçirilən "Diqqət, uşaqlar!" təhlükəsizlik aylığı çərçivəsində yol hərəkəti təhlükəsizliyinə dair maarifləndirici görüş keçirilib.
Trend xəbər verir ki, görüşün keçirilməsində məqsəd uşaq və yeniyetmələrin iştirakı ilə yol-nəqliyyat hadisələrinin qarşısının alınması istiqamətində profilaktik tədbirlərin gücləndirilməsi, eləcə də ümumtəhsil məktəblərində şagirdlərə təhlükəsiz davranış vərdişlərinin aşılanması və tədris prosesinin səmərəliliyinin yüksəldilməsinə Dövlət Yol Polisinin köməyinin artırılması olub.
Görüşdə məktəbin müəllim və şagird heyəti, Daxili İşlər Nazirliyinin Bakı şəhər Baş Polis İdarəsinin Yetkinlik yaşına çatmayanlar üzrə inspektoru, polis mayoru Kəmalə Ələkbərova, Bakı şəhər Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovnik-leytenantı Vaqif Əsədov, həmçinin Dövlət Yol Polisi İdarəsinin əməkdaşları Rasim Abdullayev və Elvin Məmmədli, Qaradağ Rayon Polis İdarəsinin əməkdaşları Ceyran Ömərova, Cavidan Muradov, Kamran Kazımov, Bakı şəhər Baş Polis İdarəsinin əməkdaşı Azər Məmmədov və digər yerli və xarici qonaqlar iştirak ediblər.
Tədbirdə şagirdlərə küçə və yollarda təhlükəsizlik vərdişləri aşılanıb, onlarla "Yol hərəkəti haqqında" Qanunun tələbləri, nizam-intizam qaydaları, eləcə də yol mədəniyyətinin yüksəldilməsi üzrə təbliğat və maarifləndirici söhbətlər aparılıb. Bununla yanaşı, şagirdlərə tütün məmulatları və spirtli içkilərdən istifadə və s. kimi zərərli vərdişlərdən uzaq olmaları tövsiyə edilib.
Həmçinin Bakı şəhər Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovnik-leytenantı Vaqif Əsədov şagirdləri maraqlandıran müxtəlif suallara aydınlıq gətirib. Şagirdlərə maarifləndirici vəsaitlər paylanıb.
Qeyd edək ki, "Diqqət, uşaqlar!" təhlükəsizlik aylığı çərçivəsində bu kimi tədbirlərin orta məktəblərdə oktyabrın 10-dək davam etdirilməsi nəzərdə tutulur.