Azərbaycan, Bakı, 27 fevral /Trend, müxbir A.Axundov/
Azərbaycan Maliyyə Nazirliyi ölkənin sığorta qanunvericiliyinə dəyişikliklər edilməsi ilə bağlı təkliflər hazırlayır və dəyişikliklərin ən vacib olanlarından biri həyat sığortası şirkətlərinin İcbari Sığorta Bürosunda iştirakını təmin etməkdir. Bu barədə bazar ertəsi Trend-ə nazirliyin Dövlət Sığorta Nəzarəti Xidmətindən bildiriblər.
"Əsas məqamlardan biri istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə işlərə dair icazəyə malik sığorta şirkətlərinin İcbari Sığorta Bürosunda iştirakının təmin olunmasıdır. Bu, büronun onların ödənişlərinə zəmanət verməsi üçün edilir", - DSNX-dən deyilib.
Məlumatda deyilir ki, hələlik təkliflər layihəsində sığortanın bu növü və onun məbləği üzrə təminatlı depozitə görə ödəniş haqqında bənd yoxdur.
"Bu gün İcbari Sığorta Bürosuna daxil olmaq üzrə qayda mövcuddur. Lakin parlamentdə müzakirələr zamanı həyat sığortası şirkətləri üçün hansı qaydaların tətbiq olunacağı məlum deyil. Bununla bağlı təklif olmayıb. Bu, yalnız onların büroda iştirakı üçün qanunvericilikdə dəyişikliklərin edilməsindən ibarətdir", - Dövlət Xidmətindən deyiblər.
Təkliflər paketi hazırlanma və müvafiq dövlət strukturları ilə razılaşdırılma mərhələsindədir.
"Sənəd rəsmi qanun layihəsi kimi parlamentə təqdim olunmayanadək detallar haqqında danışmaq olmaz. Təkliflərin parlamentə bu il təqdim olunacağı gözlənilir", - DSNX-dən bildirilib.