Azərbaycan, Bakı, 02 iyun / Trend , müxbir A.Bədəlova/ Azərbaycan Avropaya təbii qaz tədarükü mənbəyidir. Bu haqda Bolqarıstanın iqtisadiyyat və energetika naziri Petar Dimitrov Trend -a bildirib.
Martda Bolqarıstan prezidenti Qiorqi Pırvanov Azərbaycana səfəri zamanı Bakıdan ildə 1 mlrd. kub metr qaz almaq niyyətində olduqlarını bəyan edib. Sözügedən qaz həcmi hazırda fəaliyyət göstərən Bakı-Tbilisi-Ərzurum qaz kəmərilə Türkiyəyə daxil olur.
"İnanıram ki, enerji sektorunda, xüsusilə də neft və qaz sahəsində ciddi tərəfdaş ola bilərik. Azərbaycan Bolqarıstan və Avropaya qaz tədarükünün potensial mənbəyidir. Bu isə "Nabukko" layihəsinin reallaşdırılmasında hər iki tərəfdən fəaliyyətlərinin koordinasiyasını tələb edəcək", - deyə nazir eksklüziv müsahibəsində bildirib.
Hazırda "Nabukko" layihəsində "Bulgargaz Holding" vasitəsilə iştirak edən Bolqarıstan qazı yalnız Rusiyadan idaxal edir. Rusiya və Bolqarıstan arasında Qara dənizin dibiylə qaz çatdıracaq "Cənub axını" qaz kəmərinin tikintisi üzrə müqavilə imzalanıb.
Dimitrovun dediyinə görə, alternativ neft və qaz mənbələri tələb edən enerji tədarükü diversifikasiyası Aİ-nin siyasətidir. Onun sözlərinə görə, Azərbaycan Aİ-yə qaz tədarükünün real mənbəyidir.
"Bolqarıstan alternativ qaz tədarükünün təminatında maraqlıdır. Hazırda biz Azərbaycanla ildə 1 mlrd. kub metr qaz tədarükü üzrə danışıqlar aparırıq. Lakin inanırıq ki, bu hələ başlanğıcdır", - deyə Dimitrov bildirib.
Bolqarıstan nümayəndə heyətinin Azərbaycana səfəri iyunun 3-5-də gözlənilir. Nümayəndə heyətinin tərkibi İqtisadiyyat və Energetika Nairliyi, Xarici İşlər Nazirliyi, "Bulgargaz Holding" və "ESPO" elektrik şəbəkəsi operatorunun nümayəndələrindən ibarət olacaq. Səfər çərçivəsində Bolqarıstan nümayəndə heyətinin 15 konfransda və "Xəzərin nefti və qazı" sərgisində iştirakı nəzərdə tutulub.
Dimitrov bildirib ki, Qara dənizə Bakı-Supsa və Bakı-Novorossiysk boru kəməri vasitəsilə çatdırılan neftin tranziti üçün Azərbaycan Burqas-Aleksandropulis və ya Burqas-Vlyora neft kəmərindən istifadə edə bilər.
"Bu, Azərbaycan neftinin dünya bazarına ixracı marşrutlarının diversifikasiyasına daha çox imkan verəcək. Bolqarıstan Azərbaycanın tərəfdaşı olmaq istəyir və lazım gələrsə ölkənin Aİ ilə əməkdaşlığında, həmçinin enerji qanunvericiliyinin reallaşdırılmasında köməyini göstərəcək", - deyə nazir bildirib.
Dimitrov "Nabukko" qaz kəmərinə toxunaraq qeyd edib ki, bu layihə Avropa İttifaqının üstünlüyüdür və layihənin ilk fazasının reallaşdırılması zamanı qaz tədarükündə Azərbaycan mühüm rol oynayacaq. Onun sözlərinə görə, Azərbaycan "Nabukko"nun nəql imkanlarının böyük hissəsini qarşılaya bilər.
"Azərbaycan "Nabukko" layihəsinin həyata keçirilməsində mühüm rol oynayan ciddi tərəfdaşdır", - deyə Dimitrov bildirib.
Azərbaycan və Bolqarıstan arasında birgə maşınqayırma, metallurgiya, elektronika, kimya sənayesi, əczaçılıq, yüngül sənaye, kənd təsarrüfatı və heyvandarlıq, qida sənayesi, İT texnologiyaları, nəqliyyat da daxil olmaqla iqtisadi əməkdaşlıq üzrə müqavilələr imzalanıb.
"Ölkələrimizin iqtisadi inkişafındakı uğurlar iqtisadi əlaqələrin genişləndirilməsi potensialını artırır və biz bu potensialdan istifadə ilə bağlı Azərbaycanla birgə addımlar atırıq", - deyə Dimitrov bildirib.