Azərbaycan, Bakı, 20 oktyabr / Trend , müxbir S.Kazımlı/ Bakının Binəqədi rayon Polis İdarəsinin əməkdaşları dələduzlüqla məşğul olan qadını saxlayıb.
Bakı Şəhər Baş Polis İdarəsindən Trend -a verilən məlumata görə, oktyabrın 15-də Bakı şəhəri Rəsulzadə qəsəbəsində yaşayan Əsli Heydərova Daxili İşlər Nazirliyinin "102" xidmətinə evindən 3 600 manat və 800 dollar pul oğurlanması barədə məlumat verib.
Heydərova evində işləyən iki nəfər ustadan şübhələndiyini deyib.
Aparılan əməliyyat tədbirləri zamanı qadının verdiyi məlumatın həqiqətə uyğun olmadığı məlum olub.
Məlum olub ki, Heydərova bir neçə şəxsə pul borclu olub.
Oktyabrın 18-də istintaqa ifadə verən Heydərova bildirib ki, Valeh adlı bir şəxsin evində xidmətçi işləyir və onun iki uşağına dayəlik edir.
Oktyabrın 15-də Valeh Heydərovaya 3600 manat pul və 800 dollar (cəmi 5 min dollar) verərək qardaşı Rövşənə çatdırmağı tapşırır. Heydərovanın başqa şəxslərə borcu olduğundan, verilən pulu borclu olduğu şəxslərə verir. Daha sonra özünü sığortalamaq üçün "102" xidmətinə zəng edərək yalan məlumat verir.
Heydərova həbs olunub və barəsində Binəqədi rayon Polis İdarəsində cinayət işi açılıb.
Məqalə müəllifi ilə əlaqə ünvanı: [email protected]