Azərbaycan, Bakı, 20 oktyabr/ Trend , müxbir N.Abdullayeva/ Azərbaycanın Şəki şəhərində endokrinoloji xəstəliklərin diaqnostikası üzrə laboratoriya açılaсaq. Laboratoriyanın yaradılmasını Yunanıstan XİN maliyyələşdirəcək, - bu ölkənin Azərbaycandakı səfirliyindən bazar ertəsi Trend -a bildiriblər.
Laboratoriyanı 2009-cu ilin əvvəlində açmaq planlaşdırılır.
"Patra" Universitetinin professor Neoklis Topoulosun başçılıq etdiyi yunan həkimləri bu həftə Azərbaycana səfər edəcəklər, - səfirlikdən bildiriblər.
Səfərin məqsədi Azərbaycan ərazisində humanitar fəaliyyətin on illiyini qeyd etməkdir. Həkimlərin səhiyyə naziri Oqtay Şirəliyev və Şəkinin icra hakimiyyətinin rəhbəri ilə görüşləri nəzərdə tutulur.
Layihəni Yunanıstanın Xarici İşlər Nazirliyi maliyyələşdirəcək.
Azərbaycanın Səhiyyə Nazirliyinin 2007-ci il tarixli sonuncu statistikasına əsasən, Azərbaycanda 11 700 nəfər endokrinoloji xəstəliklərdən əziyyət çəkir. Onların əksəriyyəti ölkənin şimal və şimal-qərb rayonlarına - Quba, Xaçmaz, Şəki və Zaqatalada yaşayır.
Müəlliflə əlaqə saxlamaq üçün elektron ünvan: [email protected]