Bakı. Trend:
Azərbaycanda parlament seçkiləri yüksək səviyyədə keçirilib.
Trend xəbər verir ki, bu barədə Pakistan parlamentinin senatoru Afnan Ula Xan A. jurnalistlərəaçıqlamasında bildirib.
"Seçki prosesini diqqətlə təhlil etdikdən sonra, seçkilərin yüksək səviyyədə keçirildiyini müəyyən etdik. Biz bütün əlaqədar partiyaları və Azərbaycan xalqını təbrik edirik. Ümid edirik ki, Azərbaycanda demokratiya inkişaf edəcək, çünki vətəndaşların seçki prosesində iştirakı ölkə üçün çox böyük əhəmiyyət kəsb edir", - o vurğulayıb.
Qeyd edək ki, sentyabrın 1-də Azərbaycanda növbədənkənar parlament seçkiləri keçirilib. İlkin nəticələrə görə, seçkilərdə seçici fəallığı 37,27 faiz təşkil edib. Seçkilərdə səs verən seçicilərin sayı 2 196 771 nəfər olub. 5895 seçki məntəqəsi protokollarını MSK-ya təqdim edib.
Seçkiləri müşahidə etmək üçün 112 min 749 yerli müşahidəçi qeydə alınıb. Onlardan 65 mindən çoxu siyasi partiyaların nümayəndələridir. Qeydə alınmış beynəlxalq müşahidəçilərin sayı 598 nəfər olub ki, onlar 51 Təşkilatı, 69 ölkəni təmsil edib. Parlament seçkilərində qeydə alınan 990 namizəddən 305-i 25 siyasi partiyanın nümayəndəsidir. 371 nəfər siyasi partiyaların üzvü olmasına baxmayaraq, partiyalar tərəfindən namizəd olaraq irəli sürülməyiblər. Ümumilikdə 676 namizədin siyasi partiya mənsubiyyəti var.
