Trend in ATƏT-in fəaliyyətdə olanı sədri, Belçikanın xarici işlər naziri ilə müsahibəsi
- ATƏT Cənubi Qafqaz ölkələri, xüsusilə Azərbaycanla hansı əsas istiqamətlərdə əməkdaşlıq etmək niyyətindədir?
- Cənubi Qafqazın hər üç ölkəsi 55 dövlətin daxil olduğu Avropada təhlükəsizlik və əməkdaşlıq Təşkilatının tamhüquqlu üzvüdür. Bu ölkələrdən hər birində ATƏT-in nümayəndəliyi vardır.
Azərbaycana gəlincə, 1999-cu ilin noyabrın 16-da ATƏT-in Daimi Şurası Bakıda aşağıdakı vəzifələri əhatə edən tam və geniş mandatlı nümayəndəliyin yaradılması haqqında qərar qəbul edib:
-ATƏT-in prinsip və öhdəliklərinin yerinə yetirilməsinə, eləcə də ATƏT çərçivəsində ATƏT-in təhlükəsizliyin və sabitliyin humanitar, iqtisadi və ekoloji aspektləri daxil olmaqla fəaliyyətinin bütün sahələrində Azərbaycan Respublikası ilə əməkdaşlığa yardım edilməsi;
- Əlaqələrin qurulmasına yardım edilməsi, fəaliyyətin əlaqələndirilməsi, ATƏT-in fəaliyyətdə olan sədri və digər təşkilatları arasında informasiya mübadiləsinə, o cümlədən beynəlxalq təşkilatlar və instututlarla əməkdaşlığa şəraitin yaradılması;
- Yerli hakimiyyət orqanları, universitetlər, tədqiqat institutları və qeyri-hökumət təşkilatları ilə əlaqələrin qurulması və dəstəklənməsi, ATƏT-in iştirakı ilə tədbirlərin təşkilinə yardım edilməsi;
- ATƏT-in fəaliyyətdə olan sədri və digər təşkilatlarının mühüm hesab etdiyi tapşırıqların yerinə yetirilməsi və Azərbaycan Respublikası ilə ATƏT arasında razılaşdırılması.
Eyni zamanda, ATƏT-in Bakı ofisi polisə yardım proqramı, milli mütəxəssislər üçün məhkəmə proseslərinin monitorinqi üzrə treninqlər, kiçik və orta müəssisələr (KOM), o cümlədən regional iqtisadi inkişaf, düzğün idarəetmə və antikorrupsiya fəaliyyəti, ətraf mühitlə bağlı məsələlərə dair məlumatlılığın gücləndirilməsi və bərpa olunan enerji resurslarına yardım kimi çoxsaylı faydalı fəaliyyət növləri ilə məşğul olur.
- Dağlıq Qarabağ münaqişəsinin nizama salınmasında ATƏT-in səylərinin prioritet istiqamətləri hansılardır?
- Siyasi dialoq münaqişənin həllinin yeganə əlverişli yolu olaraq qalır. Digər həll yolları ATƏT-in dəyərləri və öhdəlikləri ilə bir araya sığmır. Əgər əsas prinsiplər üzrə hər hansı razılıq əldə olunsa, o zaman ATƏT sazişin gerçəkləşdirilməsi üçün mümkün olan hər şeyi etməyə hazırdır.
Sazişin beynəlxalq zəmanətlərlə dəstəklənən bitkin və tamhüquqlu sülh müqaviləsi ilə əvəzlənməsi üçün qarşıda hələ çox işlər görülməlidir. Mən söz verə bilərəm ki, ATƏT bu prosesdə əlindən gələn köməyi etməyə hazırdır.
- Bu gün münaqişə zonasında sülhməramlı qüvvələrin yerləşdirilməsinə ehtiyac varmı?
- Tərəflərin müraciət etdiyi halda ATƏT sülhməramlı qüvvələrin yaradılması, eləcə də iqtisadi və ekoloji sazişlərə yardım da daxil olmaqla, hər hansı razılaşmanın yerinə yetirilməsində köməklik etməyə hazırdır.
- Siz ATƏT-in Minsk qrupunun fəaliyyətindən razısınızmı?
- Belçika təşktlatdakı sədrliyi dövründə ATƏT-in Minsk Qrupunun həmsədrləri ilə əməkdaşlıqda sülh prosesində irəliləyişlərə nail olunması üçün əlindən gələni edəcək. Mən vaxtımı bu prosesə sərf etməyə hazıram və əgər hər hansı bir qərar qəbul olunarsa, biz bu qərarın gerçəkləşdirilməsini təmin edə bilərdik.
- ATƏT mayın 13-də Milli Məclisə təkrar seçkilərin monitorinqi üçün özünün müşahidə missiyasını Azərbaycana göndərəcəkmi?
- Azərbaycanın ATƏT-in Daimi Şurasının 2 fevral 2006-cı il tarixində yaydığı bəyanatında deyilir ki, "Azərbaycan Respublikasının 6 noyabr seçkilərini müşahidə etmək üçün müşahidəçilər göndərilməsi ilə bağlı ATƏT-in üzv ölkələrinə ünvanladığı dəvət 13 mayda keçiriləcək təkrar seçkilər üçün də qüvvədə sayılır". Bu bəyanata əsasən, Demokratik Təsisatlar və İnsan Hüquqları Bürosu seçkilərin monitorinqi üzrə missiyasını hazırlayır.