Azərbaycan, Bakı, 10 fevral / Trend, müxbir N.İsmayılova /
Azərbaycanın iqtisadi inkişaf naziri Şahin Mustafayev fevralın 16-da Tbilisidə keçiriləcək biznes forumunda iştirak edəcək. Bu barədə cümə günü Trend-ə nazirlikdən bildiriblər.
Azərbaycanın İxracın və İnvestisiyaların Təşviqi Fondundan (AZPROMO) verilən məlumata görə, AZPROMO, Türkiyənin TOBB təşkilatı və Gürcüstanın "Invest in Georgia" agentliyinin təşkil etdiyi forum "Radisson Blu Iveria" hotelində keçiriləcək.
Biznes forumunda hər üç tərəfdən kənd təsərrüfatı (kənd təsərrüfatı məhsullarının becərilməsi, saxlanılması, emalı və daşınması), tikinti, turizm, tekstil, energetika, daşınmaz əmlak və əczaçılıq sahələrində fəaliyyət göstərən şirkətlərin iştirakı nəzərdə tutulur. Tədbirə Türkiyə və Gürcüstan tərəfdən 200-ə yaxın iş adamının qatılacağı gözlənilir.
Tədbirlə bağlı əlavə məlumat almaq üçün əlaqəli şəxs Anar Nuriyevə müraciət edə bilərsiniz. (Tel.: 012 5980147/48, daxili: 123; e-mail: [email protected]).
2011-ci ilin yanvar-noyabr ayları ərzində Azərbaycanla Türkiyə arasında mal dövriyyəsi 1,5 milyard dollar, Azərbaycanla Gürcüstan arasında isə 551,8 milyon dollar təşkil edib.