Azərbaycan, Bakı, 10 mart /Trend, müxbir Ş.Cavadsoy/
Azərbaycan şou-biznesində yeniliklər diqtə edən rəqibsiz estrada ulduzu, pop-diva Aygün Kazımova növbəti dəfə oxucularımızın təəccübünə səbəb olacaq açıqlamayla çıxış etdi. Trend-ə danışan xalq artisti yaxın gələcəkdə gerçəkləşdirmək ehtimalı böyük olan plastik cərrahiyyə əməliyyatları üçün vacib sayılan risklər barəsində bunları söylədi: "Baxmayaraq ki, hazırda xarici görkəmimdən razıyam, amma hər dəqiqə anidən qərar verib, şəxsi həkimim olan tanınmış plastik cərrah Rauf Əşrəfovun şəfalı əllərinin köməyindən yararlana bilərəm (gülür). İndi deyəcəyim fikirlər sizə qəribə gəlməsin, gözəl görünmək istəyən istənilən xanım plastik cərraha müraciət etmək sevdasına düşə bilər. Lakin heç kim Aygün kimi, riski gözə alıb, dəfələrlə əməliyyat otağına girməyə cəhd edə bilməz. Nə edim ki, mən qorxmaz insan kimi doğulmuşam. Risk etmək həyat prinsiplərimdən biridir", - Aygün Kazımova dedi.
Söhbətimiz zamanı pop-divaya faydalı təklif etməkdən çəkinmədik. "Sayını bilmədiyiniz plastik cərrahiyyə əməlliyyatları üçün yetərincə maliyyə vəsaiti xərclədiyiniz məlum məsələdir. Bəlkə, özəl klinaların birinin reklam üzü olmaq təklifini dəyərləndirib, estetik gözəlləşməyə ehtiyac duyduğunuz anda bu istəyi heç bir ödəniş etmədən həyata keçirəsiniz?" təklif-sualımıza Aygün xanımdan səmimi cavab aldıq: "Olduqca maraqlı və yerində edilmiş təklifdir, diqqət ayırıb mənim büdcəmi fikirləşdiyiniz üçün təşəkkürlər. İnanın, Moskvada fəaliyyət göstərən özəl klinikaların birinin rəhbəri elə də uzaq olmayan keçmişdə mənə təklif etmişdi ki, onların klinikalarının siması kimi reklama çəkilib, Bakıda tanınmalarına şərait yaradım. Əvəzində də onlar istədiyim vaxt bir qəpik ödəmədən plastik cərrahiyyə əməliyyatlarımı etsinlər. Özü də klinikanın rəhbəri tanınmış plastik cərrahdır və adı da Namiqdir (gülür). Zarafatla demirəm həkimin adı Namiqdir, Qaraçuxurlu yox a (yenə gülür). Mən Rusiyada kifayət qədər tanınan həmin həkimə başa saldım ki, cərrahiyyə əməliyyatlarımı reallaşdırmağı hər həkimə etibar edə bilmirəm. Yadınızdadırsa, uzun illər xarici görünüşümdə dəyişiklik etməyi, yalnız Sank-Peterburqda çalışan tanınmış plastik cərrah Nekrasovun şəfalı əllərinə həvalə etmişdim. Məndən sonra Azərbaycandan həkim Nekrasovun qəbuluna o qədər xanım yollandı ki... İndi isə həkim Rauf Əşrəfovun təbliğatıyla məşğulam (gülür). Amma doğrudan da təklifinizdə həqiqət var. Gərək, Bakıda fəaliyyət göstərən və plastik cərrahiyyəni həyata keçirən klinikaların arasında kastinq (seçim turu) keçirim. Hansı özəl tibb mərkəzinin təklifi daha yaxşı olsa, onların da reklam siması olaram. Və beləcə, gözəllik üçün xərclədiyim pullarım da cibimdə qalar", -Kazımova əlavə etdi.