Azərbaycan, Bakı, 2 may / Trend müxbir S.Ağayeva /
Azərbaycan və Belarus Xarici İşlər nazirlikləri arasında siyasi məsləhətləşmələr aparılacaq. Trend-in məlumatına görə, bu barədə çərşənbə günü Azərbaycan XİN-in mətbuat xidmətindən bildiriblər.
Bu məqsədlə cari ilin 3-5 may tarixlərində Azərbaycanın xarici işlər nazirinin müavini Xələf Xələfovun həmin ölkəyə səfəri nəzərdə tutulub.
Səfər çərçivəsində nazir müavininin Belarus Baş nazirinin birinci müavini Vladimir Semaşko, Belarusun xarici işlər naziri Sergey Martınov və xarici işlər nazirinin müavini İqor Petreşenko ilə görüşləri planlaşdırılır.
Görüşlər zamanı ikitərəfli münasibətlərin inkişaf etdirilməsi ilə bağlı məsələlər müzakirə olunacaq.